A alcaldesa de Mos, Nidia Arévalo, e a concelleira mosense de Facenda e Economía, Feli Rodríguez, informaron de que o Plan Municipal de control de cumprimento coas taxas e tributos municipais, iniciado o pasado verán co comezo da nova lexislatura, empeza a dar os seus froitos e as arcas do Concello ingresarán este ano 2024 aproximadamente 800.000 euros máis entre o recibo do lixo, o IBI de Audasa pola autopista AP-9 e o inicio do cobro da taxa por uso de instalacións municipais.

As representantes locais Arévalo e Rodríguez declararon a este respecto que “este Plan responde á política de xestión económica eficaz e eficiente do goberno municipal e da concellería de Facenda en particular que, co apoio dos departamentos de Intervención e Tesourería, iniciou unha exhaustiva laboura de revisión e fiscalización para asegurar que todo o mundo cumpra coas súas obrigas tributarias sen prexuízos para ninguén; respondendo á máxima vontade de xustiza social”, explican.

Deste xeito o Concello de Mos comezou hai meses a revisión do Padrón das empresas que non estaban dadas de alta, para pasar a cobrarlles a taxa por recollida de lixo. Imposto municipal que non sofre incremento no seu importe dende hai 12 anos, pois leva conxelado desde 2012.

Con esta revisión a administración local pasará a ingresar uns 200.000 euros anuais máis, que en 2024 serán 600.000, ao contemplarse ata 3 anos con efecto retroactivo e cobrarse tamén os atrasos.

Por outra banda Audasa deberá aboar tamén ao Concello de Mos en 2024 170.000 euros en concepto de IBI pola Autopista AP-9 e reclámanselle tamén os 50.000 euros correspondentes ao pasado ano 2023 (desde data 21 de agosto). 

Por último o Concello de Mos, en aras de "continuar con este camiño de equidade e xustiza social respecto das obrigas tributarias, seguirá a traballar para actualizar o Padrón de todas as taxas e impostos e que toda a veciñanza, tanto empresa como habitantes particulares, contribúan en igualdade de condicións, sen agravios para ninguén" segundo explican nun comunicado de prensa.

AEMOS pide flexibilidade

Dende Aemos aseguran que a Administración local debe ter "certo grao de condescendencia" nese proceso, sobre todo ante pequenas compañías que se atopan agora cunha débeda moi elevada en relación á súa envergadura e que en ningún momento mostraron indicios de que houbese mala fe.

Neste sentido, a asociación ofrece a súa mediación ao Concello ante os seus asociados, pero non só para interceder a favor desa flexibilización, senón tamén para resolver casos nos que se está detectando que a reclamación por un servizo de recollida de lixo chega ao mesmo tempo a distintas entidades mercantís dependentes dunha mesma firma empresarial e radicadas nun único inmoble.

Aemos reitera no comunicado a súa "demanda de melloras en servizos e infraestruturas tanto nos propios polígonos como nas zonas nas que se asentan as empresas e que se atopan afastadas destes enclaves de concentración industrial". Fai uns meses a Asociación de Empresarios mosense dirixiu as súas principais peticións a algún polígono industrial específicamente, agora incide na necesidade de que esas melloras cheguen a calquera punto do termo municipal no que haxa actividade empresarial. O obxecto de esas actuacións sería non só a recollida de lixo, senón tamén saneamento, abastecemento, infraestruturas viarias ou telefonía, entre outras.