A Mesa pola Normalización Lingüística solicita medidas para garantir o dereito ao uso do galego en todas as comisarías, tras a queixa presentada por unha veciña de Pontevedra acusada por un axente de "faltar ao respecto á autoridade" por reclamar o seu dereito a ser atendida na súa lingua.

Segundo a denuncia, o axente declarou non entender o galego e cuestionou o dereito da cidadanía a expresarse nesta lingua ante as institucións públicas. A pesar de acceder a cambiar de lingua, o axente continuou obstaculizando o proceso. A muller decidiu interromper o trámite e volver noutro momento para presentar unha queixa por non ser atendida na súa lingua, ante unha persoa competente en galego. Nese momento, o axente interpuxo unha denuncia contra a muller por "faltar ao respeto á autoridade".

O presidente da Mesa, Marcos Maceira, recorda que "os dereitos lingüísticos son parte dos dereitos humanos" e que "a policía debería protexelos". A entidade esixe ao Ministerio do Interior que informe a todas as forzas de seguridade dos dereitos que deben defender e propón unha campaña específica para promover o uso do galego nas relacións coa policía.