O sábado 20 de abril, ás 17 h, o grupo de Cáritas do arciprestazgo da Louriña organiza a primeira edición da súa “Andaina solidaria”, co obxectivo de recadar fondos para poder continuar desenvolvendo os prexentos que levan a cabo desde esta organización na bisbarra. A iniciativa conta coa colaboración dos concellos do Porriño, Mos e Salceda de Caselas, así como da Asociación de Hostaleiros do Porriño, Pan do Porriño e Dj Pitty.

A andaina presentouse hoxe aos pés da Igrexa de Santa María do Porriño, que será punto de partida este sábado. O alcalde do Porriño, Alejandro Lorenzo, a alcaldesa de Mos, Nidia Arévalo, acompañada pola concelleira de Política Social mosense, Sara Cebreiro, e a alcaldesa de Salceda de Caselas, Loli Castiñeira, presentaron a actividade xunto cos representantes de Cáritas Parroquial, Pepi Rodriguez, Sugui e Beatriz Correa, hostaleiros e o Dj Pitty, que animará o fin da camiñata.

Esta ruta, que ten un nivel medio de dificultade, comezará na igrexa de Santa María do Porriño, continuará pola senda do Louro, Fonte do Cristo, Capela das Angustias, Malladoura e Aloques, rematando na Capela do Cristo, onde os/as participantes repoñerán forzas cunha chocolatada e roscas.

A inscrición ten un custe e 5 euros, para todas as persoas maiores de 14 anos – os menores desta idade participan gratis. Tamén se aceptan donativos a través do número de Bizum 08323, baixo o concepto “Andaina”. As persoas interesadas en participar poden inscribirse ou solicitar máis información n o número de teléfono 662 455 815.

Os representantes municipais animaron a toda a veciñanza a participar e sumarse a esta acción solidaria camiñando por unha boa causa.

Cáritas parroquiais do Val da Louriña

Cáritas Parroquian atende na Louriña a 70 familias. Co obxectivo de centrar nas persoas a atención, recentemente cambiou o seu tradicional modelo de axuda social de doazón de alimentos e roupa por tarxetas económicas. Tal e como indican, desta maneira, dignifican o proceso de atención e responden mellor ás necesidades dos seus usuarios/as.

Ademais ofrecen nas súas parroquias do Porriño, Mos e Salceda de Ccaselas obradoiros de formación e búsqueda de emprego, atención a maiores, obradoiros de costura, e acollida e acompañamento como acción central.