ABANCA e a Cooperativa de Armadores de Pesca do Porto de Vigo (ARVI) acaban de asinar un novo acordo de colaboración que busca dar resposta ás demandas dun sector imprescindible para a economía da comarca de Vigo e do conxunto de Galicia. O convenio, que conta con diferentes opcións de crédito, permite aos armadores facer fronte aos retos da súa actividade diaria e mellorar aspectos esenciais para o seu futuro. A entidade financeira renova así a súa histórica alianza con esta agrupación que, nos seus 60 anos de vida, converteuse nunha referencia mundial, cunha frota asociada que abarca unha importante variedade de artes de pesca e que está presente nos principais caladoiros do planeta, poñendo no mercado productos pesqueiros de moi alta calidade nutricional, asegurando un suministro estable a cadea alimentaria, ademais de contribuír ao emprego nas zonas costeiras e ao mantenemento da cadea mar-industria.

O novo acordo foi rubricado esta mañá na cidade olívica polo director territorial de ABANCA en Vigo, Walter Álvarez, e o presidente de ARVI, Javier Touza. Durante o encontro —ao que tamén acudiu o director de ABANCA Mar, Javier Fraga, e no que tamén estivo presente o director xerente de ARVI, Edelmiro Ulloa — os representantes de ambas entidades acordaron manter unha comunicación fluída para abordar temas de interese para o sector, como o apoio de ABANCA ás empresas no anunciado PERTE Mar-Industria, e outros aspectos clave como a renovación da frota, a descarbonización ou o relevo xeracional.

No documento recopílase un completo catálogo de financiamento con liñas e solucións de crédito pensadas especificamente para dar resposta varios deses retos do sector. Destacan produtos como a hipoteca naval, deseñada para a construción, compra ou reparación de embarcacións, que permitirá aos profesionais contar con barcos máis modernos, eficientes e respectuosos co medio ambiente, pero que tamén ofrezan mellores condicións de habitabilidade a bordo.

Do mesmo xeito, o convenio promove ademais, outros produtos específicos para realizar investimentos sostibles e de mellora da eficiencia enerxética, así como opcións flexibles a medida do sector para financiar, da forma máis eficaz, as necesidades de liquidez das empresas ou para anticipar axudas públicas ou o pago de impostos.