“Hipocrisía, cinismo e, no mellor dos casos, outro flagrante incumprimento dos seus propios compromisos”. Así definiu Ana Laura Iglesias, portavoz na Deputación do Grupo Provincial do PSdeG-PSOE, “que despois de 9 meses de lexislatura o Goberno do PP siga sen recibir a 15 alcaldes e alcaldesas da provincia, todos socialistas por suposto, que remitiron as súas solicitudes para ter unha reunión na Deputación de Pontevedra”.

En rolda de prensa, Ana Laura Iglesias, acompañada da viceportavoz e alcaldesa de Redondela, Digna Rivas, avanzou que levarán “o desprezo do goberno a estes concellos ao pleno do venres e denunciou “este novo alarde de deslealdade institucional, que non só se fai por criterios partidistas ás alcaldías do PSOE senón a toda a veciñanza ”. “Que non esquezan, dixo, que o PSOE goberna a 500.000 habitantes desta provincia mentres o PP goberna a 200.000”  A portavoz  detallou que “en moitos casos téñense remitido escritos ata en dúas e tres ocasións sen que, por enriba, estes alcaldes e alcaldesas tiveran a máis mínima resposta aínda que fose simplemente por educación, cousa que tampouco teñen”.

Iglesias lamentou “esta nova anomalía democrática do actual goberno amais da constatación dos  incumprimentos do presidente. A portavoz lembrou frases literais de López cando repetía que “sería un aliado dos concellos sen cores políticos, que estaba demostrando que non facía diferencias ou incluso o colmo de prometer que visitaría os 61 concellos nos primeiros 6 meses no cargo. Pois pasaron 9 meses e seguen esperando”, sinalou.

A portavoz socialista engadiu que esta deslealdade institucional do goberno provincial se aplica a todos os niveis, relatando tamén como coa actual Deputación os alcaldes e alcaldesas que non son do PP non son avisados cando o presidente ou integrantes do goberno visitan os seus concellos. “É lamentable, asegurou Iglesias, e non ten precedente. Co goberno de progreso non había curso, premios ou acto nun concello, que supuxera a visita da presidenta ou deputados/as, sen que desde Presidencia avisaran con antelación a esa alcaldía”. Ana Laura Iglesias engadeu que “o mesmo está a ocorrer coa sonroxante apropiación de proxectos do anterior goberno que está a facer o equipo de Luís López”. A portavoz detallou visitas a estradas “que xa estaban en obras con nós, como en As Neves ou Cuntis, facéndoas pasar como proxectos do actual goberno, ou presumindo de todas as actuacións do Plan Pon2030. É patético escoitalos”

O despropósito de “+ Convivencia”
Na rolda de prensa, a portavoz do PSdeG-PSOE denunciou tamén “o escándalo que está a ocorrer con “+ Convivencia”, o programa do anterior goberno “En Ruta coa Depo” co que en 8 anos levamos a mais de 100.000 persoas a coñecer a provincia, 20.000 prazas por ano”. Ana Laura Iglesias revelou que “só se pode entender a manobra da actual Deputación, cargando ás asociacións da provincia con toda a complexa tramitación do programa, como un exemplo de vagancia imperante neste goberno cando antes o único do que tiñan que preocuparse os colectivos era de escoller unha ruta, pasar o listado de persoas para cada excursión e desfrutar”.

“Agora, revelou a portavoz socialista, teñen que tramitalo todo: facer unha memoria, xestionar medios de transporte, guías turísticos oficiais, restaurantes, seguros e asumir calquera responsabilidade. É inaudito que asociacións, que na maioría son de persoas maiores, xubiladas e sen moitos recursos, tiñan que facer case un máster para poder enfrontar o programa e que o presidente, por enriba, presuma de que lles dan 1000 euros para elo”. A deputada lamentou tamén o “brutal tixeretazo ao programa pasando dos 470.000 euros que destinaba o anterior goberno aos 220.000 actuais” e revelou que “moitos colectivos xa decidiron non participar trasladando a súa indignación e malestar por semellante cambio. Teñen que cobrar ata 20 euros a cada participante para poder cubrir os gastos cando antes pagaban 7 e asumir toda unha serie de obrigas inviables para a maioría das asociacións”. “Iso teno que facer a Deputación que para iso está. Claro que é moitísimo traballo, sabémolo ben porque nós o facíamos, eles escollen descansar e que todo o traballo o asuman os colectivos”.

Dúas mocións socialistas para o pleno do venres
O grupo provincial socialista presentará no pleno do próximo venres dúas mocións de infraestruturas para falar das estradas autonómicas e provinciais. Respecto á rede viaria que depende da Xunta, o PSdeG-PSOE instará ao pleno da Deputación a esixir ao goberno de Rueda un plan integral de mellora do firme e a adopción de medidas de seguridade nas estradas autonómicas que se sitúan á cabeza da sinistralidade na provincia. Tamén que se reclame á Consellería que rematen as diferencias partidistas no tratamento das estradas en función da cor política dos concellos polos que discorren. De feito, Ana Laura Iglesias denunciou que “se está dando o caso de treitos da mesma estrada en bo estado cando pasa por un concello gobernado polo PP e nunha situación lamentable en treitos que discorren por concellos que non gobernan”.

En canto á rede provincial que xestiona a Deputación, o grupo socialista esixe ao goberno de López que retome os proxectos de mellora das vías provinciais que deixou en marcha o anterior executivo e que presenten no prazo de tres meses a planificación das actuacións a desenvolver, especialmente nos núcleos rurais e urbanos.