O alcalde recibe ás patinadoras do Porriño gañadoras do bronce no Campionato de España

Sara Hernández, de Atios, Noa Pereiro, de Torneiros, Marta Caballero, do Porriño, e Tania Expósito, de Mosende, foron calorosamente recibidas polo alcalde Alejandro Lorenzo en recoñecemento á súa conquista histórica no campionato de España de patinaxe artística.

As catro talentosas atletas, que forman parte do Clube de Patinaxe Artístico Ribex, lograron o terceiro lugar na categoría de Grupo Show Grande, marcando así un feito sen precedentes ao ser o primeiro equipo galego en subir ao podio nesta modalidade no campionato de España.

Esta medalla de bronce tamén garante a clasificación directa para o campionato do mundo, que terá lugar na cidade italiana de Rímini no próximo mes de setembro.

Tania confesou emocionada que "lutamos durante catro anos polo cuarto lugar nacional e nunca imaxinamos poder subir ao podio. Estamos moi contentas de que o noso traballo dea froitos".

Estas patinadoras concilian os seus estudos cos adestramentos, que durante a época de competicións poden superar as 25 horas semanais. Tania, con 23 anos, estuda Enxeñaría de Telecomunicacións na Universidade de Vigo; Sara, con 21 anos, Educación Social na Universidade de Santiago; Marta, con 17 anos, no IES Pino Manso; e Noa, con 16 anos, no IES Ribeira do Louro.

"Este é un deporte moi bonito que require moito sacrificio", continuou Tania, "ao ser minoritario, non ten moito apoio de patrocinadores e nós temos que custear todo".

O alcalde aproveitou para felicitar ás gañadoras, destacando "o seu esforzo e constancia, que son, sen dúbida, un exemplo para moitas mozas", desexándolles "unha experiencia inesquecible no campionato do mundo, e que vaia acompañada dunha boa clasificación".