A alcaldesa de Mos, Nidia Arévalo, e o novo Conselleiro de Cultura, Lingua e Xuventude, José López Campos, mantiveron unha reunión na tarde de onte en Santiago de Compostela para abordar diversos proxectos culturais e patrimoniais para o municipio. Entre os temas destacados, sobresaen a terceira fase da rehabilitación da emblemática Casa Reitoral de Petelos e a promoción do Castro de Torroso como un importante recurso histórico e turístico.

A antiga Casa Reitoral de Petelos, unha xoia arquitectónica datada do século XV e catalogada como Ben de Interese Cultural, está a recibir unha importante intervención de rehabilitación. Coa recente asignación de 300.000 euros por parte da Xunta de Galicia para a segunda fase do proxecto, o edificio está a ver consolidados os seus muros, creouse unha estrutura intermedia e a cuberta foi completada, sumando aproximadamente 225 m² de superficie restaurada.

Pola súa banda, o Castro de Torroso, un dos máis destacados xacementos arqueolóxicos castrexos da Galicia, está a ser obxecto dun proxecto de valorización por parte do Concello de Mos. Coa recente adquisición de 2.000 metros cadrados de terreos contiguos ao Castro, o concello pretende iniciar un proceso de posta en valor desta zona histórica. O proxecto contempla a futura compra de máis terreos na área para expandir a actuación.

Este Castro, descuberto na primavera de 1983, conta cunha extensión aproximada de 2,8 hectáreas e unha altura máxima de 137 metros. É un dos xacementos castrexos máis estudados e de maior interese científico e cultural en Galicia, coñecido polos seus gravados rupestres, cerámicas e obxectos líticos.

Arévalo e López Campos tamén abordaron outros asuntos de interese, como a próxima edición do festival infantil Canto Conto, a adquisición de material bibliográfico para a nova Biblioteca María Magdalena e a celebración da Festa da Rosa de Mos. Reafirmaron o seu compromiso de colaboración para impulsar o desenvolvemento cultural e turístico do municipio.