O Concello do Porriño continúa apostando por proxectos innovadores para difundir a lingua e cultura galegas entre a nosa comunidade educativa.

A xuntanza estivo organizada polos/as coordinadores/as das bibliotecas dos centros escolares, coas que o Concello do Porriño colabora. Un evento educativo, cultural e lúdico, que utiliza a contorna natural da parroquia de Torneiros, o seu parque do Piñeiro, coñecido como parque Alba.

Tras o éxito das pasadas edicións, a celebración da III Xuntanza Literaria deu lugar a unha xornada de convivencia e fomento e animación á lectura, favorecendo a inclusión coa participación de preto de 400 persoas de doce entidades: ACEESCA, o Centro de Día de Torneiros, a Asociación AFAGA, o CPR Santo Tomás, IES Pino Manso, CEIPP Fernández López, CPR Hermanos Quiroga, CEIPP Antonio Palacios, IES Ribeira do Louro, CEIP da Cruz-Budiño, CEIPP de Atios e o CEIPP da Ribeira.

O alumnado distribuiuse por grupos nos que, ademais da lectura individual, compartiron lecturas grupais de fragmentos de obras galegas.  Estas expresións literarias reforzáronse tamén, coa música (outra forma de expresión literaria) que serve para expresar determinados sentimentos e emocións dunha forma máis lúdica e divertida.

Outro ano máis, Xoán Curiel, con dous artistas máis en escena, ofreceu un concerto participativo de 50 minutos ao estilo dunha representación teatral; no que pequenos, mozos e maiores, non foron simples espectadores/as senón que participaron desta actividade lúdica e cultural mediante coros e xogos e sempre empregando a lingua galega como ferramenta de traballo.

Marta Melón, xefa de estudos do CEIP da Ribeira, coordina a organización desta actividade cós responsables das bibliotecas de cada centro. “A convivencia entre centros e xeracións é do máis bonito que vivimos neste día, ademais do fomento da lectura, que é cada vez máis necesario”, destaca.

“Este tipo de actividades lúdico-educativas acercan e normalizan a lingua galega entre a veciñanza de tódalas idades e condicións”, declara Carolina González, concelleira de Educación e Normalización Lingüística. “É precioso - engade- ver como interactúan en galego, aportándose valores, ensinanzas, anécdotas e cariño entre eles, todo nun ambiente distendido, ao aire libre, que se presta á socialización”.   

Alejandro Lorenzo, alcalde do Porriño, coñeceu de primeira man as impresións dos participantes e, como un máis, sumouse ás actividades. “É impresionante ver como este parque tan fermoso se enche de cultura galega nun día como hoxe, con preto de catrocentos participantes, de distintas idades”, concluíu.