O presidente da Deputación de Pontevedra, Luis López, entregou este mércores os primeiros premios “E ti, que pensas da igualdade”, promovidos polo ente provincial, nun auditorio do centro Príncipe Felipe no que se reuniron preto de 400 estudantes Educación Primaria, Especial, Secundaria, Bacharelato e FP procedentes centros de toda a provincia. “Ao ver este auditorio cheo de 400 rapazas e rapaces, chegamos a dúas conclusións claras: a primeira é que acertamos con este premio e a segunda é que a igualdade é o futuro da provincia”, confesou o presidente da Deputación despois de entregar os 21 galardóns da primeira edición deste certame.

O concurso consistiu na elaboración por parte dos estudantes dos distintos cursos de traballos individuais ou grupais que reflectiran o que entenden eles e elas por igualdade. Deste xeito, os de Primaria elaboraron debuxos, collages e contos; mentres que os da ESO e FP fixeron bandas deseñadas, videopoesías, cancións e podcasts. “Uns traballos que van nunha mesma liña, compartindo unha mesma causa e unha mesma reivindicación: A nosa sociedade camiña cara a Igualdade plena e real entre homes e mulleres, na nosa provincia rexeitamos calquera tipo de discriminacións entre homes e mulleres e a  nosa veciñanza está comprometida para pechar esas fendas de xénero que son cada vez máis estreitas, pero tristemente aínda existen”, recoñeceu Luis López, que entregou os premios en compañía da deputada provincial de Benestar Social e Igualdade, Sandra Bastos.

Neste sentido, o titular do goberno provincial explicou aos participantes na primeira edición deste certame “E ti, que pensas da igualdade?” cal era o obxectivo da Deputación ao convocar estes premios. “Uns premios pensados para que sexades vós, a xente máis nova da provincia, os que nos ensinedes a nós, aos maiores, que pensades da Igualdade. Porque a visión que tedes vós sobre a igualdade pode ser moi diferente á que temos os adultos. Mellor, seguramente. Sen vós non imos poder construír esa sociedade do futuro que estou seguro que será unha sociedade: igualitaria, xusta e inclusiva”, asegurou López.

Ademais, o presidente animouse tamén a confesar aos asistentes a esta entrega de premios como entende el a igualdade. “Eu son pai dun neno e unha nena e imaxino a igualdade como un futuro no que os dous poidan medrar e ter as mesmas oportunidades sen que un sexa máis que o outro, que sexan valorados por como son e polo seu traballo e, sobre todo, sen sufrir ningún tipo de discriminación de ningún tipo”, explicou. Unha meta pola que se traballa a diario desde a Deputación a través de medidas como a convocatoria de certames novidosos como este ou o de “Boas prácticas en igualdade”, os actos de conmemoración de días como o 8-M ou o 25-N, así como iniciativas encamiñadas a poñer en valor o traballo de mulleres como “Aqui faltan páxinas”, “Mulleres que opinan” ou “Pontevedra e América, unha mirada en feminino”.

“Volvo darvos os parabéns e recórdovos que conseguir unha sociedade igualitaria é cousa de todos: de homes e mulleres, de nenos e nenas e de institucións como esta Deputación ou os colexios. E vouvos pedir algo: que nos contedes que pensades da igualdade durante toda a vida”, concluíu o presidente Luis López.

Listaxe completa de premiados
1º e 2º de primaria. Categoría individual.
3º premio: Andrea Blanco Cortés (CEIP Virxe do Rocío de Vigo, 2º de primaria).
2º premio: Alba Martínez Muñiz (CEIP Coirón-Dena de Meaño, 2º de primaria).
1º premio: Arián Domínguez Carneiro (CEIP Sabarís de Baiona, 1º de primaria).

3º e 4º de primaria. Categoría individual.
3º premio: Pablo Cacabelos Ramallo (CEIP Coirón-Dena de Meaño, 4º de primaria)
2º premio: Lucía Sanmartín González (CEIP Coirón-Dena de Meaño, 4º de primaria)
1º premio: Carla Fandiño Cobas (CEIP Coirón-Dena de Meaño, 4º de primaria)

3º e 4º de primaria. Categoría grupal
1º premio: Clase de 3º B do CEIP Coirón-Dena de Meaño.

5º e 6º de primaria. Categoría individual.
3º premio: Leticia Fernández María (CEIP Virxe do Rocío de Vigo, 5º de primaria).
2º premio: Noelia García del Río (CEIP Sequelo de Marín, 5º de primaria).
1º premio: Iván Gamallo Gómez (CEIP Virxe do Rocío de Vigo, 6º de primaria)

5º e 6º de primaria. Categoría grupal
3º premio: Clase de 5º do CEIP San Benito de Lérez de Pontevedra.
2º premio: Clase de 6º do CEIP Virxe do Rocío de Vigo.
1º premio: Clase de 5º do CEIP San Roque de Darbo (Cangas).

Educación especial. Categoría individual.
3º premio: Estela Pintos Ligero (CEE Pontevedra).
2º premio: Lucía Vázquez García (CEE Pontevedra).
1º premio: Natalia Rodríguez Argibay (CEE Pontevedra).

Educación especial. Categoría grupal.
1º premio: CEE Pontevedra.

Educación Secundaria Obrigatoria. Categoría grupal.
3º premio: Colexio Labor de Vigo.
2º premio: CPI Arquitecto Palacios de Nigrán.
1º premio: IES Luis Seoane de Pontevedra.

Bacharelato e FP básica ou de Grao Medio. Categoría individual.
1º premio: Yara Tristán Pais (IES O Carril de Vilagarcía).