A Xunta, a través do ente autonómico Augas de Galicia, contribuíu á eliminación dun punto de vertido de augas residuais que afectaba a un rego no lugar do Carballiño, no concello pontevedrés de Redondela.

O persoal do Programa de Control de Vertidos constatou esta anomalía no transcurso dos labores rutineiros de inspección que vén desenvolvendo no ámbito dos concellos integrados na Demarcación Hidrográfica Galicia-Costa. Nese momento comprobaron a existencia dunha deficiencia na acometida dunha vivenda á rede de saneamento municipal que discorre polo lugar, provocando ese vertido de augas residuais sen depurar ao dominio público.

Ante esta situación, os profesionais de Augas de Galicia procederon a comunicar o problema ao Concello de Redondela co obxectivo de que adoptase as medidas correctoras oportunas co fin de reparar a situación.

Nunha inspección posterior dos técnicos á mesma zona verificouse o cese do caudal de augas residuais unha vez corrixida e deficiencia, co que se constatou a eliminación dese vertido incontrolado á rede de saneamento do municipio.