Un bombeiro faleceu este sábado en Vigo ao ceder unha parede na avenida de Beiramar, onde realizaba traballos de revisión dun tellado, segundo confirmou o 112. A vítima quedou ferida grave ao caerlle enriba unha parede mentres inspeccionaba unha cuberta xunto a varios compañeiros. Os equipos de emerxencia só puideron certificar a súa morte.

O levantamento do cadáver produciuse pouco antes da unha do mediodía. Persoal do Instituto de Seguridade e Saúde Laboral, do xulgado e da Policía Xudicial inspeccionaron o lugar dos feitos. Tamén se achegaron ata alí o tenente de alcalde, Carlos Font, a concelleira de Seguridade, Patricia Rodríguez, e o xefe da dotación dos bombeiros de Coruxo, Guillermo Domínguez.

O concello de Vigo decretou dous días de loito oficial polo falecemento do bombeiro, suspendendo todas as actividades lúdicas previstas e trasladando o pésame á familia nun comunicado oficial. As bandeiras ondearán a media hasta en sinal de dor polo pasamento deste traballador municipal.

O alcalde de Vigo, en nome do goberno municipal, amosou o seu recoñecemento a todo o corpo de bombeiros de Vigo polo labor que desenvolven cada día, suspendendo tamén a súa axenda pública en sinal de respecto.

O Bloque Nacionalista Galego (BNG) lamentou profundamente o tráxico falecemento, expresando o seu afecto e apoio á familia, amizades e compañeiros do bombeiro. Ademais, solicitaron que se esclarezan as circunstancias do accidente e propuxeron iniciar o próximo Pleno cun minuto de silencio na memoria do falecido.

O Partido Popular (PP) de Vigo sumouse ao loito oficial decretado polo Concello, suspendendo os actos previstos para o día de hoxe e trasladando as súas condolencias á familia e compañeiros do Corpo de Bombeiros de Vigo.