O Concello de Mondariz Balneario adquire unha parcela "estratéxica"

O Concello de Mondariz Balneario anunciou a adquisición dunha parcela de 3.000 metros cadrados, que inclúe varios edificios en estado ruinoso, no centro da vila por un importe de 139.755 euros. Esta compra foi posible grazas a unha achega da Deputación de 97.940 euros, complementada con 41.814 euros de fondos propios do concello.

O goberno local ten previsto destinar esta propiedade a acoller distintos servizos e instalacións municipais, entre os que se inclúen un centro social, unha oficina de turismo, un aparcadoiro e unha zona verde. Estas iniciativas teñen como obxectivo mellorar a atención á veciñanza e dinamizar unha contorna prioritaria para a vila.

A adquisición desta propiedade ao SAREB representa unha gran oportunidade para rehabilitar unha área céntrica da vila que actualmente se atopa nun elevado estado de abandono. Para levar a cabo esta restauración, o Concello de Mondariz Balneario xa iniciou a procura de financiamento co que restaurar os edificios destinados ao novo centro social e á oficina de turismo, infraestruturas moi demandadas pola veciñanza ante a falta de espazos axeitados para estes servizos.

Durante a sinatura da adquisición, o alcalde, César Gil, destacou que Mondariz Balneario leva tempo sufrindo un continuo deterioro patrimonial, reflectido no aumento de edificacións e vivendas abandonadas. Este fenómeno preocupa á veciñanza e motivou o compromiso da administración municipal para a súa recuperación. "A boa xestión económica do Concello e uns orzamentos deseñados para revitalizar a vila permítennos dar agora este paso, incrementar o patrimonio municipal e sentar as bases para a recuperación deste espazo", afirmou o alcalde.

Con esta iniciativa, o Concello de Mondariz Balneario busca non só mellorar as infraestruturas e servizos dispoñibles para os seus habitantes, senón tamén fomentar un desenvolvemento sostible e atractivo que contribúa ao benestar e á calidade de vida na vila.