A primeira fase do Hospital Público de Montecelo executada ao 70 por cento

A conselleira de Vivenda, María Martínez Allegue, e o conselleiro de Sanidade, Antonio Gómez Caamaño, supervisaban  a semana pasada en Pontevedra a maior obra pública da cidade, destinada a unificar unidades asistenciais sanitarias. Acompañados polo alcalde, Miguel Anxo Fernández Lores, e o xerente da área sanitaria, José Manuel Flores, visitaron o novo Montecelo, onde se centralizarán as urxencias, UCI e especialidades sanitarias. Con case 200 operarios traballando, a obra abarcará 92.000 metros cadrados e estará rematada en 2025.

O Concello está a executar obras de saneamento e pluviais, así como a acometida eléctrica. Ademais, púxose en servizo o vial perimetral. O novo hospital, cunha planta en forma de “Z”, contará cun aparcamento de 128 prazas de urxencias e outro de 892 prazas, a finalizar en 2026. Tamén terá unha nova cafetería con vistas á ría de Pontevedra.

Gómez Caamaño destacou que o Novo Montecelo, ademais de centralizar servizos, ampliará en máis de cen camas e ofrecerá novos servizos de Radioterapia e Medicina nuclear, evitando que máis de 500 pacientes ao ano se despracen a Vigo. O hospital contará tamén cunha UCI pediátrica e un hospital de día para saúde mental infanto-xuvenil en Lérez.