A Deputación de Pontevedra anunciou a ampliación do prazo para que os estudantes recentemente titulados de ciclos de Formación Profesional (FP), Formación Profesional Básica e cursos que conducen á obtención de Certificados de Profesionalidade dos niveis I, II e III poidan participar no programa de mobilidades europeas Erasmus+ 2023. Esta extensión permitirá aos estudantes desfrutar das mobilidades internacionais ata o 31 de maio de 2025, en lugar de finalizar o 31 de agosto deste ano como estaba inicialmente previsto.

Nunha rolda de prensa, o presidente provincial, Luis López, destacou a importancia desta medida afirmando que permitirá seguir “traballando con este programa, para dotar aos mozos da provincia de ferramentas que contribúan a mellorar as súas competencias e formación, porque son o futuro desta provincia”.

O programa Erasmus+ 2023 conta cun orzamento de preto de 1,2 millóns de euros e lévase desenvolvendo desde xuño do ano pasado. No mesmo participan un total de 39 centros escolares da provincia, integrados no consorcio Erasmus+ creado pola Deputación. Ata o momento, 38 estudantes de FP de centros da Estrada, A Illa de Arousa, As Neves, Cambados, Moaña, Pontevedra, Redondela, Tomiño, Vigo e Vilagarcía de Arousa xa aproveitaron esta oportunidade de mobilidade. Actualmente, 17 destes estudantes aínda están no estranxeiro, en países como Italia, Irlanda, Portugal ou República Checa. Ademais, a Deputación está a tramitar 86 novas mobilidades.

O obxectivo do programa é que os estudantes adquiran experiencia laboral, melloren as competencias vinculadas ao seu perfil profesional, desenvolvan actitudes éticas e laborais propias da actividade profesional, así como melloren as súas expectativas laborais, teñan unha idea máis clara sobre as súas aspiracións e obxectivos profesionais, e melloren as competencias nunha lingua estranxeira.

“Avanzamos, damos pasos cara adiante para que a xuventude, para que esta xeración, sexa a mellor preparada da historia e teña máis e mellores oportunidades”, asegurou Luis López.