A Xunta de Galicia abre este martes o prazo para que as persoas maiores de 60 anos poidan solicitar estadías no programa Benestar en Balnearios. A convocatoria, publicada este luns no Diario Oficial de Galicia (DOG), contará con máis de 1.230 prazas distribuídas en 15 establecementos de toda a Comunidade.

A conselleira de Política Social e Igualdade, Fabiola García, presentou  a décima edición do programa en Vila de Cruces. García destacou que o prazo de solicitudes estará aberto durante un mes a partir do martes. Como novidade, este ano tamén se ofertarán estadías durante os meses de verán, permitindo así que os maiores poidan desfrutar do programa de xullo a decembro.

"A Xunta continúa a mellorar esta iniciativa tan valorada polas persoas maiores, permitindo que manteñan unha vida activa e se coiden a si mesmas", afirmou a conselleira. Este ano, o número de prazas incrementouse ata superar as 1.230 e as quendas ampliáronse para incluir os meses de verán.

A conselleira recordou que a Xunta procura responder ás novas necesidades e preferencias das persoas maiores, que desexan vivir unha xubilación chea de actividades. Neste sentido, mencionou outras iniciativas como as aulas sénior e os convenios coas tres universidades galegas, así como o novo Carné +65, que ofrece descontos, vantaxes e viaxes para desfrutar desta etapa da vida.

O programa Benestar en Balnearios ofrece estadías de 10 días en réxime de pensión completa en 15 balnearios da Comunidade. A Xunta destina un 9% máis de orzamento que na edición anterior, alcanzando os 300.000 euros.