O parque acuático do Complexo Deportivo de Monterrei inaugurou  a súa tempada de verán de 2024, que se prolongará ata o vindeiro 15 de setembro. O horario de apertura será de 12 a 21 horas, cunha ocupación diaria máxima de 2.500 persoas.

Nesta nova campaña de verán, os usuarios poderán desfrutar da Fase 1 do parque acuático ao completo. Estarán dispoñibles as instalacións abertas en 2023 -como a piscina infantil, a piscina de relax, a piscina de ondas e a zona de splash- ás que se suman novos servizos como aparcadoiro, vestiarios, sendas peonís e unha zona de xogos para nenos. Ademais, este ano incorporáronse catro novas atraccións acuáticas: hidrotubos abertos e pechados, e dous novos tobogáns.

As entradas pódense adquirir de xeito unitario ou en bonos de dez accesos. O prezo da entrada é de 4 euros, sendo 2 euros para os menores de 18 anos e gratuíta para os menores de 3 anos. O bono terá un custo de 30 euros e de 15 euros para os menores de 18 anos. As familias numerosas e as persoas con discapacidade terán un desconto do 50% e os grupos grandes tamén contarán con prezos bonificados. As entradas pódense adquirir fisicamente no Complexo de Monterrei ou a través da aplicación en liña da páxina web do Complexo de Monterrei.