A alcaldesa de Mos, Nidia Arévalo, e o seu tenente de alcaldesa e concelleiro de Obra Pública, Camilo Grandal, informaron nesta semana de que lle vén de ser concedida á administración local mosense unha subvención ao abeiro do Plan + Provincia 2024 da Deputación de Pontevedra, na liña 1 – investimentos, do mesmo, por importe de 127.315,67 euros; e co obxecto de acometer sendos muros de contención nos Camiños da Míllara en Gándara parroquia de Tameiga e da Muralla en A Furna Casalmorto, parroquia de Pereiras.

Os representantes municipais, Arévalo e Grandal, informaron de que “as obras previstas neste proxecto demostran a aposta deste goberno local pola seguridade viaria, que vén sendo unha constante nas últimas lexislaturas, durante as que vimos desenvolveno cada ano un Plan Anual de Mellora de Camiños e Estradas Municipais”. Así, apuntaron tamén que se levará a cabo a execución dun muro no Camiño da Míllara de lonxitude 58 metros e altura variable, sendo a media de 2,5 metros; e doutro muro no Camiño da Muralla, de lonxitude 41 metros e altura media de 4,3 metros.

Previo á execución dos muros realizaranse actuacións tales coma limpeza e desbroce, desmontaxe e retirada de postes de viña e outros servizos afectados pola traza, movementos de terras e retirada de entullos.

As obras de acometida de ambos muros consistirán na instalación de estruturas a base de mampostos de granito Rosa Porriño e disposición de medios de protección con banda tipo bionda.

O investimento total a realizar no muro do Camiño da Míllara ascende a 54.658,80 euros e no muro do Camiño da Muralla a 72.565,88 euros.

O prazo de execución previsto é de 6 meses, 3 meses para cada un dos muros.