As Bandeiras Verdes de Galicia seguen consolidándose na súa quinta edición ao rexistrarse este ano un 79% máis de candidaturas que en 2023, cun total de 34 concellos aspirantes a recibir esta distinción.

Este recoñecemento -creado e xestionado polo Instituto de Estudos do Territorio (IET)- pretende poñer en valor a implicación das entidades locais e da veciñanza no coidado da paisaxe e do patrimonio natural distinguindo aos concellos máis dinámicos neste eido. Neste sentido, valóranse as boas prácticas para o coidado da contorna, o respecto á paisaxe, a redución das emisións de dióxido de carbono, a posta en valor dos monumentos naturais, a educación e sensibilización ambiental, a redución do consumo enerxético e iniciativas de dignificación do territorio.

A orde coas bases reguladoras para o outorgamento deste distintivo publicouse a mediados de marzo no Diario Oficial de Galicia e a súa concesión realizarase despois do verán tendo en conta o grao de cumprimento dos criterios de valoración recollidos na orde. Os ámbitos de actuación nos que se encadran as accións incluídas nas candidaturas son a ordenación do territorio, a protección do medio ambiente e da paisaxe; o cambio climático e a eficiencia enerxética; a xestión responsable dos residuos; e as accións de sensibilización e comunicación relacionadas cos puntos anteriores.

Con estes distintivos distínguense tres categorías de concellos e os requirimentos mínimos para a obtención da Bandeira Verde son máis restritivos para aqueles concellos con maior complexidade urbana, con funcións que transcenden o ámbito municipal no sistema de asentamentos e con maiores recursos.

A este recoñecemento poden optar todos os concellos de Galicia e o seu outorgamento constituirá un mérito para a obtención de subvencións en materia de patrimonio natural e, tamén, para recibir axudas autonómicas en materia de residuos para construír e mellorar puntos limpos fixos, implantar instalacións móbiles deste tipo ou impulsar proxectos de preparación para a reutilización.

Todas as candidaturas están a ser avaliadas por un xurado técnico, que será o encargado de determinar os concellos galardoados que, posteriormente, recibirán as bandeiras nun acto público no último trimestre do ano. Desde ese momento os municipios poderán utilizar o distintivo ao longo dun ano.

Neste sentido, os concellos galardoados en 2023 foron 18: Burela, A Illa de Arousa, Oleiros, Porqueira, Sanxenxo, Alfoz, Cervo, Curtis, A Laracha, Moaña, Mondoñedo, Muros, Ordes, Outeiro de Rei, Parada de Sil, Porto do Son, Ribeira e Sober.