A Xunta de Galicia aprobou este pasado luns o decreto que autoriza a transferencia da estrada provincial EP-2003 ao Concello de Vigo. Esta vía, cunha lonxitude de máis de 1,6 quilómetros, conecta as localidades de Coruxo e Canido, discorrendo integramente polo termo municipal de Vigo.

O Concello de Vigo e a Deputación Provincial de Pontevedra asinaron un convenio para transferir a titularidade desta estrada, que se inicia na PO-552 e finaliza no punto quilométrico 1+624 no Vao. A Axencia Galega de Infraestruturas, baseándose nos informes emitidos polos servizos competentes, formulou a proposta favorable para a transferencia de titularidade.

Esta medida inscríbese no marco da Lei 8/2013, do 28 de xuño, de estradas de Galicia, que establece que a aprobación das transferencias de titularidade das estradas incluídas nas redes dependentes da Comunidade Autónoma e das entidades provinciais e locais debe realizarse mediante decreto da Xunta, por proposta da Consellería de Vivenda e Planificación de Infraestruturas, e logo do acordo entre as administracións implicadas.

Co cambio de titularidade, o Concello de Vigo adquire a competencia para actuar sobre esta vía, asumindo a responsabilidade da súa conservación e mantemento. O decreto aprobado  polo Executivo autonómico producirá efectos a partir do día seguinte ao da súa publicación no Diario Oficial de Galicia.

Este traspaso é parte das funcións do Departamento de Infraestruturas da Xunta, que inclúe a tramitación dos cambios de titularidade das estradas dependentes das redes autonómicas, provinciais e locais, co obxectivo de mellorar a xestión e mantemento das vías en beneficio da cidadanía.