O Sonrías Baixas anuncia a programación completa da súa 21ª edición

A falta de menos dun mes para a súa celebración, o festival SonRías Baixas desvelou as últimas novidades do seu cartel, distribuído durante os próximos 31, 1, 2 e 3 de agosto.

A distribución de artistas que participarán na 21ª edición do festival galego, celebrado na localidade de Bueu (Pontevedra), queda da seguinte maneira:

 
Xoves 1
LA OREJA DE VAN GOGH
ÁLVARO DE LUNA • LA LA LOVE YOU
ANABEL LEE • MOROCHOS
SABELA • SEXY ZEBRAS
 
Venres 2
ROZALÉN • CHEF´SPECIAL
FILLAS DE CASSANDRA • TRAVIS BIRDS
COOL NENAS • GILIPOJAZZ • LA ÉLITE • MUERDO
 
Sábado 3
TANXUGUEIRAS • RAYDEN
GINEBRAS • THE RAPANTS
EMLAN •  GRANDE AMORE
INÉS HERNAND •  MARLENA
MONDRA • MR. KILOMBO
 

As últimas dúas novidades incorporadas ao cartel son Marlena e Grande Amore, sendo ambas as formacións os protagonistas da tradicional Sesión Vermú que ten lugar ao mediodía da última xornada (este ano, o sábado 3 de agosto). O dúo formado por Ana e Carolina chega ao recinto de As Lagoas despois de converterse nunhas das bandas revelación da tempada grazas ao seu pop fresco e que conta historias cotiás de amor e desamor. No seu repertorio non faltarán hits coñecidos xa por todos como "Amor de verano", "Me sabe mal" ou "bailamorena". 

Pola súa banda, Grande Amore volven tras poñer patas arriba o seu escenario e ao público  na súa actuación da pasada edición. Rabia e hastío que converten en himnos coreables e cun selo único que aborda desde os sintetizadores ao back metal, o punk ou o rock industrial, nun resultado totalmente xenuíno e inclasificable.

Os abonos xerais e as entradas de día continúan dispoñibles desde a web do festival e a través de Enterticket.es. Como xa ocorreu na edición anterior, o 31 de xullo terá lugar a festa de benvida no recinto e tamén se abrirá a zona de acampada, que este ano trae como novidade a posbilidade de acceso á mesma para as persoas que adquiran a entrada dun só día e non só para os compradores do abono completo.

Ademais, e tal e como se fixo o ano pasado, unha vez presentada a programación completa, as 200 primeiras persoas máis rápidas que sexan usuarias do Carné Xove da Xunta de Galicia poderán optar a un 15% de desconto nos seus abonos.

SonRías Baixas é un festival promovido pola promotora PlayPlan Cultural. Conta coa colaboración institucional do Concello de Bueu; e o patrocinio da Deputación de Pontevedra e Turismo Rías Baixas a través da márca Rías Baixas Fest, e da Xunta de Galicia a través de Xacobeo e a marca Fest Galicia. O evento tamén conta co patrocinio de El Águila e Johhnie Waker.

Esta edición, que tras estas últimas confirmacións estará formada por 25 artistas, chega encabezada por nomes como La Oreja de Van Gogh, Tanxugueiras, Rozalén, Ginebras, Álvaro de Luna ou Rayden, nunha aposta da organización, a promotora PlayPlan, para tratar de cambiar a tendencia marcada pola propia industria musical, e apostando por un forte protagonismo das bandas lideradas e formadas por mulleres como nomes principais do cartel.

Tamén se mantén unha forte representación da escena musical galega, con nomes como Fillas de Cassandra, Mondra, Sabela ou The Rapants, encabezada pola punta de lanza deste auxe que está a vivir o panorama galego, como son Tanxugueiras.

A todos estes nomes súmanselles as interesantes propostas de Chef’Special, La La Love You, Anabel Lee, Cool Nenas, Emlan, Gilipojazz, Inés Hernand, La Elite, Morochos, Mr. Kilombo, Muerdo, Sexy Zebras e Travis Birds, mantendo así a tendencia do festival de ser un altofalante para coñecer novas propostas musicais.

A primeira xornada estará encabezada por La Oreja de Van Gogh, que chegan por primeira vez a Bueu sendo, sen dúbida, referentes de toda unha xeración e unha das nosas bandas máis internacionais e queridas. Os donostiarras, que se atopan en proceso de composición do seu próximo álbum, prometen ofrecer un show moi especial en forma de percorrido por toda a súa traxectoria, que xa supera os vinte e cinco anos, e que nos regalou hits e clásicos que xa forman parte da historia musical do noso país. Ademais, Álvaro de Luna tamén se estreará no noso festival, presentando “UNO”, o seu novo disco publicado o pasado setembro, e avalado polo éxito de grandes cancións como "Todo Contigo”, “Portarse Mal” ou o seu primeiro hit en solitario, “Juramento eterno de Sal”. As cancións frescas estarán garantidas grazas a La La Love You, que acaban de ateigar o Wizink Center en Madrid e xa comezan a presentar os temas do seu novo álbum, e Anabel Lee, coa súa mestura de punk británico, noise, new wave e punk rock. A proposta do xoves completarana a enerxía de Sexy Zebras, coñecidos dabondo xa en salas e festivais de todo o país polos seus potentes e explosivos directos, o bo rolo de Morochos, que estrearán o seu segundo disco, “De donde vengo”, enchendo Bueu de boas vibras fusionando flamenco e reggae cunha guitarra e un caixón, e a proposta electro pop de Sabela que presentará as cancións do seu disco “Ceniza”.

O venres 2 de agosto temos o pracer de recibir por primeira vez na vila a Rozalén, que presentará sobre o escenario do SonRías temas dos seus cinco discos de estudo e tamén de “El abrazo”, o seu novo e esperado traballo que verá a luz a finais do mes que vén, nunha proposta que rende sempre homenaxe ao folclore e á música tradicional. Desde Holanda aterrarán Chef’Special coa súa mestura de rock, hip-hop e reggae para facer do seu concerto unha festa, e Travis Birds debullará o seu último álbum “Perro Deseo”, onde nos presenta o seu único universo a través de todas as pulsións, sentimentos, aspiracións e ilusións que conforman a súa identidade e imaxinario. A representación galega do día correrá a cargo de Fillas de Cassandra e o seu hipnótico show “Últimas Dionisíacas”, e os ritmos latinos e de raíz unidos ao urbano actual serán responsabilidade de Muerdo, que fará repaso por un repertorio que inclúe temas clásicos como “Semillas”, “Lejos de la ciudad”, “Vas a encontrarte” ou “Llegué hasta ti”. Pola súa banda, La Élite prometen unha boa dose de irreverencia e o descaro unidas a letras acedas e divertidas, Gilipojazz deleitarannos coa súa mix de estilos como o funk, o rock progresivo, o metal e a música clásica, e un ano máis contaremos con Cool Nenas e o seu particular rave coreografiada que revolucionou o concepto de dj set.

E para finalizar, na última xornada contaremos cun dos buques insignia da música galega: Tanxugueiras volven ao festival nun momento doce tras o seu paso fai dúas edicións e avaladas polo seu recente sold out histórico no Coliseum da Coruña, onde reuniron a máis de 9.000 persoas para poñer o broche de ouro á súa extensa e exitosa Xira Midas. Tamén teremos o privilexio de ser testemuñas da última actuación de Rayden en Galicia. No show do madrileño non faltarán os seus grandes clásicos e tamén presentará “La Victoria Imposible”, o seu sétimo álbum en solitario, todo iso acompañado dun directo cunha banda explosiva que sorprende alá por onde pisa, e Ginebras demostrarán por que son unha das bandas con mais proxección dos últimos anos grazas aos seus temas indie pop con selo propio e as súas letras autobiográficas contadas con moito humor. Emlan traerá a Bueu o seu pop rock de letras con fondo optimista e esperanzador, e o bo rolo continuará grazas a Mr. Kilombo e a súa posta en escena interactiva apoiada por pegadizos temas de letras coidadas con mimo e sutileza, incluíndo os singles do seu novo disco, “Todo este caos”, estreado hai apenas dous meses. Para pechar este último día de festival, Mondra achegará o folk festivo e revolucionario do seu performance “Folía das ardentes", The Rapants presentarán o seu terceiro álbum, “La Máquina Del Buen Rollo”, infestado de melodías de herdanza disco, rock e mesmo hip hop, e Inés Hernand ofrecerá un dj set cunha selección de temas que combinarán o bo rollo e a enerxía á que sempre nos ten afeitos nas súas aparicións.

SonRías Baixas foi galardoado recentemente nos Iberian Festival Awards co premio na categoría Best Touristic Promotion. Celebrando o ano pasado a súa vixésima edición, centra todos os anos gran parte da súa comunicación na promoción turística da zona na que se celebra, dándolle gran importancia ao seu enclave privilexiado na vila de Bueu (Pontevedra), corazón das Rías Baixas. A experiencia festivaleira que proporciona a súa localización idílica é un dos seus atractivos turísticos principais, xuntando a música coa natureza, a gastronomía local e a praia da zona.

Ademais de integrar a rexión turística no propio nome do festival, o SonRías Baixas é o único festival que conta cun Parque Nacional no Concello no que se celebra, e promove de forma activa suxestións de miradoiros, praias, gastronomía e carreiros, incluíndo constantes referencias turísticas na súa comunicación pre, durante e post celebración do evento a través da súa web, redes sociais e aftermovie.

Este premio é xa o terceiro IFA que recibe SonRías Baixas, tras ser galardoado  en 2020 co Excelence Award para Jordi Lauren, director do festival, e co correspondente a Best Communication & Marketing Strategy na edición de 2022.