A conselleira de Vivenda e Planificación de Infraestruturas, María Martínez Allegue, visitou onte xunto ao alcalde Alejandro Lorenzo e o delegado territorial de Pontevedra, Agustín Reguera, a intervención de acondicionamento realizada na contorna do paseo do río Louro, desenvolvida no marco do Plan Hurbe da Xunta de Galicia.

A actuación consistiu na pavimentación do viario paralelo á vía férrea nun treito de 1,5 quilómetros, coa delimitación dun carril bici bidireccional de 2,6 metros de ancho e unha zona de tránsito peonil de 2 metros. Ademais, instaláronse columnas de alumeado de 5 metros de altura con luminarias dotadas de sensores de presenza. O investimento total desta intervención foi de 401.000 euros, dos cales a Xunta financiou o 70% e o Concello de Porriño asumiu o 30% restante.

A conselleira María Martínez Allegue destacou a importancia do Plan Hurbe, afirmando que “é unha oportunidade real para dotar de equipamentos públicos e mellorar as contornas urbanas, con actuacións que se erixen en fundamentais para a dinamización social e cultural do territorio”.

Martínez Allegue subliñou que proxectos como o do Porriño melloran a calidade de vida de veciños e visitantes, constituíndo “a culminación con éxito dun proxecto co que queremos poñer en valor esta contorna e esta vila”. A conselleira convidou á veciñanza a desfrutar do novo espazo, destacando a colaboración entre a Xunta e os concellos como un exemplo de cooperación efectiva.

O Plan Hurbe financiou nos últimos catro anos 86 proxectos en Galicia, cun investimento total de 17,1 millóns de euros. A conselleira explicou que este plan é “un pasiño máis na posta en valor das vilas, tanto as grandes como as pequenas, e dos núcleos rurais, que defendemos nas nosas políticas de urbanismo”. Engadiu que con estas intervencións estanse a crear “as condicións propicias para o desenvolvemento sostible dos nosos concellos, a través de proxectos cos que estamos a recuperar espazos públicos e a subliñar a súa singularidade”.