O conselleiro de Educación, Ciencia, Universidades e FP, Román Rodríguez, visitou recentemente a Escola de Educación Infantil O Areal, en Baiona, para anunciar a súa ampliación. A actuación, que xa está licitada, contará cun orzamento de case 225.000€. Está previsto que as obras comecen en novembro e rematen en maio, para o que o Concello de Baiona vai conceder a licenza o vindeiro mércores, segundo informou o alcalde Jesús Vázquez Almuíña.

Rodríguez destacou a importancia desta actuación para dotar a escola dun espazo amplo onde poder desenvolver diferentes actividades didácticas e de ocio, cruciais para o desenvolvemento do alumnado de Infantil. "Seguimos os parámetros do Plan de Nova Arquitectura Pedagóxica, que aposta por espazos flexibles e polivalentes en continuidade coa natureza, como será o que construamos neste centro", detallou.

A obra consistirá na construción dun volume anexo ao edificio existente, cunha superficie total de 107,75 m². O novo espazo será flexible e poderá usarse tanto de maneira independente como estendéndoo cara ao espazo exterior, incluíndo un espazo cuberto que permita o seu uso en condicións climatolóxicas adversas.

Ademais, a nova edificación da EEI O Areal procurará a eficiencia enerxética e o respecto ao medio ambiente, minimizando a pegada ecolóxica e utilizando métodos de construción en seco. A única excepción será a cimentación e a soleira do edificio, que se realizarán con formigón armado.

A estrutura do novo edificio será de madeira laminada, con cerramentos de paneis de madeira-cemento, fiestras de madeira, divisións interiores de panel de xeso, pavimentos de tarima flotante de madeira e cuberta de zinc.