O Goberno galego deu esta semana un paso adiante no reforzo da Rede de Centros Integrados de Formación Profesional (FP) coa incorporación da Escola de Cantería de Galicia en Poio. Este novo centro especializado no sector da edificación, construción e cantería reflicte un impulso significativo para este oficio, fomentando a innovación e a tecnoloxía, ademais de atender ás demandas do sector. Así se aprobou no decreto do Consello da Xunta.

Con esta incorporación, a FP galega ve aumentada a súa estrutura estratéxica, sumando 28 centros integrados dependentes da Consellería de Educación, Ciencia, Universidades e Formación Profesional para o curso 2024/2025. Esta cifra representa o triplo dos nove centros que existían en 2009.

A transformación da Escola de Cantería de Poio nun centro integrado vén acompañada dun reforzo da oferta académica con catro novas titulacións para o próximo curso. Entre estas destaca a nova titulación de alta especialización en Pedra Natural en cantería, unha das 13 novas titulacións deste tipo que se incorporan en setembro en Galicia, con 22 prazas dispoñibles. Ademais, ofrécense o ciclo básico en Reforma e Mantemento de Edificios (18 prazas), e os ciclos de FP dual en Construción (22 prazas) e en Proxectos de Edificación (30 prazas), sumando un total de 92 prazas para o vindeiro curso, coa perspectiva de superar as 300 prazas nos próximos anos.

Este reforzo da oferta formativa vincúlase coa construción e restauración de edificacións en pedra, así como coa produción e restauración de pezas artísticas en pedra. Tamén se promove a formación no ámbito artístico mediante a produción de elementos escultóricos en pedra, incluíndo a súa restauración.

Este impulso forma parte do compromiso acadado polo Goberno autonómico, que o ano pasado asumiu a titularidade da Escola de Cantería de Poio, anteriormente dependente da Deputación de Pontevedra, para convertela nun centro público docente baixo a Consellería de Educación. Este cambio supón melloras significativas para o alumnado, xa que as ensinanzas que anteriormente eran consideradas como formación non formal pasan a ser títulos oficiais, permitindo que os antigos alumnos poidan acreditar a súa experiencia profesional.

A ampliación da rede de centros de FP en Galicia está enmarcada na Estratexia de FP Galicia 2030, que establece como un dos seus eixes principais a promoción dos centros integrados de excelencia como referencia para cada familia profesional e sector produtivo. Estes centros están destinados a desenvolver accións de innovación do profesorado coa participación activa do tecido empresarial e de institucións. Na pasada lexislatura, creáronse sete novos centros integrados, aos que se engade agora a Escola de Cantería de Galicia.