As empresas galegas do sector mar-industria están cada vez máis volcadas na internacionalización dos seus produtos, buscando ampliar a súa rede de clientes e aumentar os seus prezos ao mesmo tempo que mostran a calidade dos seus produtos en eventos nacionais e internacionais. Esta estratexia, que conta cunha sólida experiencia, leva anos promovendo os produtos do mar galegos no exterior para pechar novas vías de negocio e dar a coñecer a súa excelencia en países de todo o mundo.

Cada ano, as principais empresas do mar de Galicia acoden a diversas feiras nacionais e internacionais que lles permiten darse a coñecer a compradores de mercados emerxentes e potenciar a demanda de peixe e marisco galego, engadíndolles máis valor. Moitas destas entidades participan nestes eventos coa colaboración da Consellería do Mar mediante diversas fórmulas, mentres que outras asisten pola súa conta. Ao abeiro dos postos da Xunta de Galicia, distintas firmas do mar da comunidade participaron no que vai de ano en feiras en países como Estados Unidos (Seafood Expo North America de Boston), Xapón (Foodex Japan), Emiratos Árabes Unidos (Dubai) ou Alemaña (Seafood International Bremen).

Ademais destes certames internacionais, tamén destacan outros eventos de ámbito nacional como Salimat Abanca de Silleda, o Salón Gourmets de Madrid, a Seafood Expo Global de Barcelona, Expomar Burela ou o Fórum Gastronómica da Coruña. A Consellería do Mar salienta que a participación neste tipo de certames contribúe a que o sector avance na súa internacionalización e aumente os seus ingresos, xerando emprego e riqueza na súa contorna. Estas accións de promoción potencian ademais o consumo dos produtos pesqueiros, un hábito saudable que mellora a calidade de vida dos consumidores grazas ás súas achegas nutritivas e baixo aporte calórico.

As feiras supoñen un punto de encontro para clientes xa consolidados e un escaparate perfecto para mostrar os avances e tendencias nas distintas ramas de actividade do sector, o que axuda a captar novos clientes e a asimilar novas ideas de traballo de cara ao futuro. De feito, a asistencia a estes eventos de promoción semella dar os seus froitos, pois as exportacións galegas de produtos do mar en 2023 foron de preto de 2.800 millóns de euros, marcando así un novo récord a pesar do complexo contexto internacional marcado polos conflitos en Ucraína e Gaza, o encarecemento da enerxía e das materias primas, ademais da escalada inflacionista.

A participación da Xunta de Galicia nestes certames é demandada polas propias empresas galegas, que comprobaron que a presenza neles dá bos resultados tanto cualitativos como cuantitativos. Iso fixo que o Goberno galego pasase en pouco máis dunha década de participar en arredor dunha decena de feiras ao ano a roldar ou superar a quincena nalgúns exercicios. Este ano, a Consellería do Mar reforzou a internacionalización dos produtos pesqueiros galegos cunha inversión de 4,6 millóns de euros, un incremento do 30% respecto ao 2023. Ademais, a estratexia do Goberno autonómico neste ámbito inclúe a colaboración mediante convenios con entidades como Anfaco-Cecopesca, Clusaga, Conxemar ou a Fundación Nova Pescanova para fortalecer as accións de promoción do consumo.

GALICIA SABE AMAR

A industria galega ve na promoción a mellor garantía de continuidade e futuro para a súa actividade, pois a presenza nestes encontros axuda a incrementar as vendas e favorece o desenvolvemento socioeconómico da comunidade, contribuíndo ao mesmo tempo a unha pesca sustentable. Galicia participa nestas feiras no marco da campaña GALICIA SABE AMAR , posta en marcha en 2021, que ten como obxectivo poñer en valor os produtos do mar e agradecer o esforzo realizado polos pescadores galegos para poñer a disposición dos consumidores alimentos de máxima calidade. A esta campaña engádense outras específicas que poñen en valor recursos como a pescada, o bonito do norte, a centola, o polbo, os mariscos ou o mexillón, entre outros moitos. Tamén se inclúen produtos elaborados, como conservas ou conxelados, con importantes campañas para impulsar o seu consumo e prezos.

O traballo de promoción ten como obxectivo que os profesionais do mar conten con mellores ingresos e que a actividade se perpetúe no futuro, facéndose atractiva para as novas xeracións. A finalidade é que a xente nova vexa que o sector marítimo-pesqueiro é unha boa opción profesional e que Galicia manteña o seu papel de referente español e europeo na produción e comercialización de produtos do mar.

Estas campañas de promoción tamén destacan que consumir produtos do mar é un dos mellores investimentos para a saúde, ao mellorar a calidade de vida e aforrar en gasto sanitario, ao tempo que fomenta a sustentabilidade e a economía local. Ao adquirir peixes e mariscos frescos ou calquera dos produtos transformados ou acuícolas desta proteína mariña, estase fomentando uns mellores hábitos de vida e apoiando o traballo de todos aqueles que cada día saen ao mar para que este nutritivo recurso non falte en ningunha mesa. Este apoio é crucial nun sector que en Galicia conta cun gran peso económico, xa que o 91% das actividades económicas da comunidade están relacionadas coa pesca e a cadea mar-industria. De feito, as exportacións galegas de produtos do mar pecharon o ano pasado cunha facturación de preto de 2.800 millóns de euros.

As máis de 60 lonxas galegas poxan unha gran variedade de peixes, mariscos, crustáceos, algas ou equinodermos que poñen a disposición do consumidor un amplo abano de posibilidades para cumprir coas recomendacións de consumir, como mínimo, tres ou catro racións desta proteína á semana. Galicia predica co exemplo, xa que a dieta atlántica ten no peixe un dos seus grandes piares, contribuíndo á lonxevidade dos seus cidadáns. Galicia ostenta o segundo posto en poboación con maior esperanza de vida en España.

Fonte de Omega-3, vitaminas D e B, ferro, potasio, iodo, calcio, os peixes e mariscos son alimentos con importantes valores nutricionais e cunha pegada de carbono das máis baixas entre os produtos dispoñibles no mercado. Por iso, o consumidor actual atopa no sector extractivo e na industria transformadora a confianza necesaria para obter un produto de calidade, respectuoso co seu contorno e xerador dun gran número de empregos. Só a cadea mar-industria galega dá traballo directamente a 50.000 persoas.