O Concello do Porriño respondeu ao chamamento da Generalitat Valenciana, realizado a través da Federación Española de Municipios e Provincias (FEMP), ofrecendo axuda inmediata para afrontar a situación de emerxencia causada pola recente DANA no territorio valenciano. O goberno local puxo á súa disposición un completo equipo de apoio con recursos tanto materiais como humanos, orientado a reforzar as accións de rescate e asistencia.

O dispositivo de apoio inclúe un equipo de axentes da Policía Local, unha unidade de dron para tarefas de procura e monitorización, e un vehículo oficial completamente equipado para atender calquera necesidade urxente no terreo. Ademais, o concello ofrece bombas de achique autónomas, alimentadas con gasolina, para xestionar as inundacións en zonas de alto risco, e mobilizará unha autocaravana que servirá como posto de mando avanzado para a coordinación das tarefas de rescate.

En paralelo, o Concello impulsou unha campaña solidaria de recollida de alimentos non perecedoiros e produtos de hixiene persoal, destinados a cubrir as necesidades das persoas afectadas. A cidadanía poderá colaborar esta fin de semana no Pavillón Municipal, habilitado para recoller doazóns o sábado 2 de novembro, de 10:00 a 22:30 h, e o domingo 3 de novembro, de 10:00 a 14:30 h. Todos os subministros recollidos serán enviados á Generalitat Valenciana, en colaboración coa Federación Valenciana de Municipios e Provincias (FVMP), para a súa posterior distribución entre os afectados.