Besteiro denuncia que Rueda renuncia a 3.266 prazas públicas de escolas infantís para fortalecer o sector privado

O líder do PSdeG, José Ramón Gómez Besteiro, criticou esta semana a decisión do Goberno de Alfonso Rueda de devolver máis de 22 millóns de euros de fondos europeos destinados á creación de prazas públicas de educación infantil para nenos e nenas de 0 a 3 anos. Segundo Besteiro, esta acción evidencia a “incapacidade” do PP para xestionar os fondos e a súa aposta por un modelo que favorece ao sector privado en detrimento do público.

“Esta é unha mostra máis da incapacidade do PP para xestionar os fondos europeos e da súa aposta por un modelo que beneficia intereses privados por enriba do público. Xa o fixeron en Andalucía, é o modus operandi da dereita de Feijóo, á que pouco ou nada lle gusta o público”, declarou Besteiro.

A decisión de devolver os fondos europeos é o resultado dunha xestión ineficaz, xa que, a pesar de recibir 34,8 millóns de euros no ano 2021, o Goberno galego non foi capaz de crear as 3.417 prazas públicas prometidas na Conferencia Sectorial de Educación. A pesar de que aínda ten un ano para executar o compromiso, só logrou crear ou ampliar 205 prazas na rede pública en tres anos.

Os fondos devoltos, que formaban parte do Plan de Recuperación, Transformación e Resiliencia, tiñan como fin a creación de prazas públicas en zonas prioritarias, incluíndo áreas rurais e con risco de exclusión social. Con esta medida, o Goberno galego decide manter un sistema que privilexia os centros de xestión privada.

No momento actual, máis dunha terceira parte das prazas dispoñibles en Galicia pertencen á rede privada (13.552), outra terceira parte á pública autonómica (10.142) e case un 20% aos concellos. Neste contexto, o Goberno de Rueda compromete a súa financiación para a gratuidade das escolas infantís privadas en 2025, con 45 millóns de euros, o que para Besteiro evidencia un claro interese en favorecer o modelo concertado, perpetuando as desigualdades sociais.

Neste mesmo sentido, o líder socialista criticou tamén a disparidade no financiamento das escolas infantís. Mentres as empresas privadas reciben 310 euros por alumno ao mes, os concellos só reciben 93 euros, o que, segundo Besteiro, mostra unha política que "despreza o público e favorece sistematicamente intereses privados".

Besteiro tamén comparou a situación en Galicia co ocorrido en Andalucía, onde tamén se devolveron fondos europeos similares, pero os recursos foron redistribuídos a outras comunidades autónomas que solicitaron máis prazas públicas e gratuítas. "Galicia perde máis de 22 millóns de euros que poderían transformar a vida das familias galegas, especialmente nas zonas rurais e máis desfavorecidas. Mentres outras comunidades avanzan, aquí retrocedemos", afirmou o secretario xeral do PSdeG.

O PSdeG fixo un chamamento á cidadanía para defender un modelo educativo público, universal e de calidade. “Non podemos permitir que o PP siga desmantelando os servizos públicos, sexa en educación ou en sanidade. Galicia merece un goberno que poña ás persoas no centro das súas políticas”, remarcou Besteiro.