A choiva non impedirá que Melchor, Gaspar e Baltasar cheguen ao Porriño para compartir un momento máxico coas nenas e nenos da localidade. O Concello do Porriño confirma que, tal como estaba previsto, as Súas Maxestades os Reis Magos de Oriente estarán na vila o vindeiro 5 de xaneiro. Debido ás previsións meteorolóxicas, a recepción trasladarase ao pavillón municipal (pista principal), garantindo así que todas as familias poidan disfrutar deste evento de maneira segura e cómoda.

A tradicional cabalgata non se poderá realizar debido á chuvia, pero a comitiva real, composta por 120 persoas, chegará ao pavillón no Tren do Nadal, acompañada pola carroza do Metro de Madrid. Tamén participarán as rondallas locais, que se encargarán de amenizar a espera das/os máis pequenas/os. A Rondalla de Pontellas, a Rondalla Santa Eulalia de Atios e a Rondalla Santa María do Porriño ofrecerán as súas actuacións a partir das 17:30 h.

A recepción das cartas dos nenos e nenas será un dos momentos destacados, e as Súas Maxestades farán realidade os desexos de todos os asistentes. Desde o Concello, convidan a todas as familias a participar desta xornada especial e disfrutar dunha tarde máxica coas Súas Maxestades.