O Rosal abre as portas á memoria coa exposición ‘Voces e raíces’

A exposición ‘Voces e raíces’ chega este sábado 11 ao Rosal, organizada por tres novas creadoras: Sara Cividanes, de O Rosal; Yaiza Vila, de Tomiño; e Nayade Castro, de Euskadi. As tres son estudantes de Belas Artes na Universidade de Vigo e presentan a súa primeira exposición colectiva, que poderá visitarse de balde nos días 11, 12, 18 e 19 de xaneiro, e que incluirá diversas actividades paralelas.

A inauguración será este sábado ás 16.30 horas, cunha presentación do proxecto amenizada pola frautista Ana Domínguez e a pianista Viktoriia-Nadiia Salo. A partir das 17.30 horas, terá lugar unha mesa redonda sobre memoria histórica, na que participarán os expertos Silverio Rivas, Bieito Alonso, Helena Pousa e Moncho Leal, que guiarán ao público nunha reflexión colectiva sobre o valor da memoria.

A alcaldesa, Ánxela Fernández Callís, destacou a importancia desta iniciativa, subliñando que "é un exemplo de como a mocidade pode liderar proxectos que nos fan pensar, nos conectan coas nosas raíces e nos empuxan cara ao futuro". A alcaldesa tamén expresou o seu orgullo de que O Rosal sexa o punto de encontro entre arte e memoria.

A mostra reúne as obras de 14 artistas que exploran o concepto da memoria desde diversas perspectivas. As obras, que inclúen pinturas, fotografías, creacións audiovisuais e fanzines, ofrecen unha reflexión sobre a memoria tanto íntima como colectiva. Entre os artistas que participan na exposición están Ada Pérez, Ana Llegue, Antía Rodríguez, Carlota Montes, Carolina Ferro, Chuvia Lago, Claudio Sanemetrio, Lucía Ladero, Lucía Rodríguez, María Dueñas, Marta Díaz, Mónica Pérez, Raquel Rodríguez e Nayade Castro.

A exposición estará aberta ao público nos días 11, 12, 18 e 19 de xaneiro, en horario de 11.00 a 14.00 horas e de 16.30 a 20.00 horas. Desde o Concello, animan á veciñanza a asistir á inauguración e descubrir esta proposta artística que invita á reflexión e ao pensamento sobre a memoria.