SonRías Baixas, finalista nos Iberian Festival Awards 2025

O festival SonRías Baixas vén de ser nomeado finalista nos Iberian Festival Awards 2025, optando ao galardón de Mellor Festival de Mediano Formato. Este recoñecemento súmase aos tres premios que xa acadou en edicións anteriores, entre os que destacan os de Best Touristic Promotion, Best Communication & Marketing Strategy e o Excellence Award, este último outorgado a Jordi Lauren, director do evento. Os gañadores coñeceranse o próximo 15 de marzo nunha gala especial que se celebrará no Pavilhão Multiusos 25 de Abril de Almancil (Loulé), no Algarve portugués.

Esta nominación coincide cunha edición especialmente relevante para o festival, que este ano amplía a súa duración e se celebrará durante catro días completos, do 31 de xullo ao 3 de agosto de 2025. Ademais, a organización xa deu a coñecer a distribución dos artistas por xornadas, así como a dispoñibilidade dos abonos de tres e catro días, entradas diarias e a opción de adquirir a zona de acampada ou precargar a pulseira para pagos dentro do recinto. Toda a información e a compra de entradas están dispoñibles na páxina web oficial sonriasbaixas.info e na plataforma Enterticket.

O cartel de SonRías Baixas 2025 reunirá preto dunha trintena de artistas nunha programación diversa que aposta pola calidade e a variedade de estilos. A xornada inaugural do xoves 31 de xullo contará coa volta de La Raíz, que regresan ao escenario onde se despediron en 2019 dentro da súa Gira Reencuentro. Xunto a eles, actuarán Canteca de Macao, que celebrarán os 20 anos do seu disco "Cachai?", Muyayo Rif, que presentarán o seu novo traballo Megalithic, e Baiuca, que combinará a vangarda electrónica coa tradición galega.

O venres 1 de agosto, a xornada estará marcada polo concerto de Sen Senra, un dos artistas máis influentes da escena urbana actual, que seguirá explorando novos sons na súa triloxía PO2054AZ. Tamén subirán ao escenario Carolina Durante, unha das bandas clave do rock alternativo español, e dúas das propostas máis frescas do momento, shego e Cariño. A música galega tamén terá un peso importante esa noite con Grande Amore, que volverá despois dun pequeno parón, e Luis Fercán, que presentará o seu cuarto disco Postales Perdidas. O día completarase co directo de Melifluo, a enerxía de Juancasupersub DJ Set e as sesións de Eme DJ, que acompañarán a apertura e peche do recinto.

A terceira xornada, o sábado 2 de agosto, terá como protagonista a Alizzz, coñecido polo seu traballo con C. Tangana ou Rosalía, pero que nesta ocasión traerá os seus discos en solitario, nos que mestura guitarras dos 90 e sintetizadores. Tamén participará Judeline, unha das artistas emerxentes máis interesantes do momento, así como Maestro Espada, que combina folclore murciano e electrónica. Pola súa banda, Delaporte chegarán con Aquí y ahora, o seu quinto álbum, unha explosión de enerxía dance. A xornada completarana The Rapants, que traerán o seu La Máquina del Buen Rollo, Griso, anteriormente parte de Arnau Griso, e Capital Voskov, que ofrecerán un concerto de indie electrónico.

O domingo 3 de agosto, xornada que se engade por primeira vez ao festival, estará encabezado por Dani Fernández, quen presentará o seu novo disco La Jauría. Tamén participará Carlos Ares, cunha proposta que mestura raíces galegas e vangarda sonora, mentres que o indie chegará da man de Niña Polaca, xa convertidos nunha referencia dentro dos festivais nacionais. Xunto a eles, Marlena volverán a Bueu tras o éxito do pasado ano, ao igual que Nena Daconte, que interpretará tanto os seus clásicos como temas recentes. A xornada rematará coa enerxía de Pipiolas e un set especial de NDLR, que porá o peche á edición cun final por todo o alto.

O festival SonRías Baixas está organizado pola promotora PlayPlan, tamén responsable do recentemente presentado BIGSOUND Pontevedra, e conta co apoio do Concello de Bueu, a Deputación de Pontevedra, Turismo Rías Baixas a través da marca Rías Baixas Fest, e a Xunta de Galicia, ademais do patrocinio de El Águila. Cun cartel de gran calidade, un enfoque innovador e unha maior duración, esta edición de SonRías Baixas promete ser unha das máis especiais da súa historia.