O veterano nadador Xosé Ferreira foi recoñecido a pasada  semana co diploma “Orgullo redondelán” e a insignia do Concello de Redondela, entregados pola alcaldesa Digna Rivas, polos seus éxitos no ámbito deportivo. 

O deportista do Club Natación Redondela, que estivo acompañado de familiares e compañeiros, acadou grandes logros recentemente, como unha medalla de ouro, prata e dous bronces no Campionato Galego Máster de Inverno. Estes éxitos suman aos conseguidos en 2024, incluíndo o título de campión galego en 400 metros libres. Tanto a alcaldesa como o concelleiro de Deportes, Iván Valles, destacaron a traxectoria exemplar de Ferreira, que iniciou a súa carreira no fútbol e fútbol sala antes de destacar na natación.