O salón de plenos do Pazo provincial acolleu este sábado a tradicional cerimonia de imposición de capas ás novas donas e cabaleiros da Orde do Caldo Galego de Mourente. O evento puxo en valor a importancia desta celebración gastronómica como un atractivo turístico que reforza o posicionamento das Rías Baixas como destino desestacionalizado ligado á cultura e á gastronomía.

Durante o acto, Antonio Reguera, presidente da Orde do Caldo Galego, deu a benvida aos asistentes antes da imposición de capas aos novos confrades: Jorge Cubela, alcalde de Cerdedo-Cotobade e deputado provincial; Micaela Martínez Benavente, xerente territorial do Catastro en Pontevedra; Demetrio Gómez, concelleiro de Festas e Cultura do Concello de Pontevedra; Pablo Fernández, secretario xeral de Emprego da Xunta de Galicia; e Xosé Álvarez Castro, historiador e escritor. A cerimonia contou tamén coa intervención de Fernando Silva, presidente da Confraría Luso Galaica, e Anabel Gulías, confrade da Orde e concelleira no Concello de Pontevedra.

A celebración destacou a relevancia do caldo galego como parte do patrimonio cultural e gastronómico da provincia, así como a súa capacidade para atraer visitantes en calquera época do ano. Durante os discursos institucionais, recoñeceuse o labor das persoas que manteñen viva esta tradición, especialmente das mulleres, cuxo papel foi fundamental na transmisión desta receita ancestral.

O evento rematou coa interpretación do himno galego a cargo do grupo de gaitas Los Alegres de Mourente e cun chamamento á cidadanía para continuar gozando desta festa gastronómica que, como ocorre coas Rías Baixas, sempre invita a repetir.