Un total de 100 alumnos de 3º de Primaria participaron hoxe nunha actividade educativa promovida polo Consorcio Augas do Louro para conciencialos sobre a importancia do consumo responsable e da depuración da auga. O evento celebrouse no Multiusos das Pozas e contou coa presenza da alcaldesa de Mos, Nidia Arévalo, e da concelleira de Educación, Julia Loureiro.

Os escolares, procedentes dos CEIPs Pena de Francia, Mestre Martínez Alonso, Mestre Valverde Mayo e Petelos, asistiron a unha presentación sobre o ciclo natural da auga e o seu proceso de depuración na Estación Depuradora de Augas Residuais (EDAR). Durante a sesión, coñeceron as distintas fases do tratamento da auga, desde a súa entrada ata a súa saída despois do procesado biolóxico.

A alcaldesa destacou que esta actividade busca crear conciencia no alumnado sobre a importancia da auga para o benestar humano e ambiental, promover hábitos de consumo eficiente e resaltar a necesidade dunha correcta depuración para evitar a contaminación dos ríos.

A iniciativa forma parte do programa de actividades educativas organizadas polo Concello de Mos dentro do horario lectivo. Nesta ocasión, a actividade foi organizada por Aqualia e o Consorcio de Augas do Louro, do que forman parte os concellos de Mos, O Porriño, Salceda de Caselas e Tui, xunto con Augas de Galicia.