A delegada territorial Ana Ortiz avanzou os detalles dunha actuación enmarcada no Plan de Nova Arquitectura Pedagóxica, que inclúe intervencións noutros 27 centros educativos de Vigo

A Xunta de Galicia acometerá este verán unha renovación integral da cuberta do IES Politécnico de Vigo cun investimento que supera os 250.000 euros. A actuación foi anunciada este luns pola delegada territorial en Vigo, Ana Ortiz, durante unha visita ao centro educativo, na que detallou que as obras estarán finalizadas antes do inicio do vindeiro curso académico.

Esta intervención enmárcase dentro do Plan de Nova Arquitectura Pedagóxica da Consellería de Educación, Ciencia, FP e Universidades, que contempla a modernización de 53 centros educativos na comarca de Vigo, dos cales 28 se atopan na cidade olívica cun investimento total que roza os 9 millóns de euros.

Ademais da reforma no IES Politécnico, destacan outras actuacións como as previstas no CEIP A Doblada (167.000 euros), CEIP Balaídos (249.333 euros), CEIP Sobreira-Valadares (246.902 euros para a cuberta do patio) ou no CIFP Manuel Antonio, que contará cun investimento de 1,65 millóns de euros para mellorar a accesibilidade.

Tamén se executaron melloras na eficiencia enerxética mediante o cambio de luminarias en varios institutos, entre eles o IES A Guía, IES de Beade, IES Carlos Casares, IES do Castro, IES República Oriental de Uruguay, IES Ricardo Mella, IES Valladares e IES de Teis, con investimentos que oscilan entre os 75.000 e os 226.000 euros.

Outras intervencións previstas inclúen a reforma do ximnasio e das instalacións térmicas do IES Alexandre Bóveda (732.000 euros), a rehabilitación do CEIP Virxe do Rocío (298.257 euros), a instalación dun novo ascensor no CEIP Pintor Laxeiro (148.399 euros), ou a rehabilitación integral do IES San Tomé de Freixeiro (1,28 millóns) e do CMUS Conservatorio Superior de Vigo (1,03 millóns), entre outras.

O Plan de Nova Arquitectura Pedagóxica contempla en total preto de 2.700 actuacións en centros educativos de toda Galicia, das cales o 98 % xa están executadas, en execución ou licitadas, cun orzamento global que supera os 229 millóns de euros. O 2 % restante está en fase de redacción de proxectos ou a punto de saír a licitación.