A partir desta semana, as cinco delegacións da Axencia Tributaria de Galicia (Atriga) comezan a ofrecer atención presencial e telefónica para axudar a cubrir o modelo 600, correspondente ao imposto sobre transmisións patrimoniais onerosas e actos xurídicos documentados (ITPAXD).

Esta iniciativa está pensada para persoas físicas que ata agora presentaban o modelo en papel, principalmente por carecer de medios ou coñecementos para facelo telematicamente. A medida busca facilitar a tramitación a quen aínda non utiliza as vías dixitais.

O conselleiro de Facenda e Administración Pública, Miguel Corgos, informou ao Consello da activación deste servizo, que segue o modelo do implantado para o imposto pola transmisión de vehículos de segunda man (modelo 620). Este último, desde 2023, tramitou xa máis de 3.000 declaracións con asistencia.

Segundo datos da Atriga, en 2024 presentáronse máis de 52.000 modelos 600 en papel, o que representa preto do 25 % do total das declaracións deste imposto. O novo servizo responde, así, a unha demanda detectada entre os contribuíntes.

A asistencia abranguerá operacións como a compravenda de inmobles, a transmisión de bens mobles (agás vehículos), a constitución de dereitos reais, arrendamentos, préstamos entre particulares, obra nova ou cancelación de hipotecas.

Con esta medida, a Axencia busca avanzar cara a unha Administración máis próxima, áxil e eficiente, mellorando o acceso á información e reducindo os tempos de xestión.

O lema “Atriga contigo!” continúa guiando estas melloras, que se suman a ferramentas como a nova web, a aplicación móbil e a próxima implantación da videoasistencia.