O Goberno galego eliminou máis de 40.000 metros lineais de documentación física acumulada desde o ano 2016 para mellorar a xestión documental da Administración. Así o recolle un informe presentado hoxe ao Consello da Xunta sobre a actividade do Consello de Avaliación Documental de Galicia.

Este órgano, dependente da Consellería de Cultura, Lingua e Xuventude, funciona como consultor en materia de patrimonio documental e foi clave para avaliar, conservar e expurgar arquivos públicos, garantindo un proceso eficiente e respectuoso co marco legal e arquivístico.

Desde a súa creación en 2016, o Consello celebrou máis de 20 sesións ordinarias, nas que estudou 133 series documentais, elaborou 128 táboas de avaliación e emitiu informe sobre 152 solicitudes de eliminación.

O traballo desenvolto permitiu autorizar a destrución de 349.422 unidades de instalación, das cales máis do 87 % pertencían á Administración autonómica. A eliminación destas caixas supuxo un aforro de espazo e recursos significativos, liberando máis de 40 quilómetros de documentos sen valor.

A súa actividade abrangue o conxunto do sector público galego: consellerías, concellos, universidades e outras entidades poden presentar propostas. Ademais, cada departamento pode consultar que series foron avaliadas e cales quedan pendentes.

O Consello tamén define criterios obxectivos para conservar ou destruír documentos segundo o seu valor legal, informativo ou histórico, regula o acceso á documentación e establece os prazos de transferencia entre arquivos.

A eliminación de documentos só se realiza tras ditame favorable do Consello e resolución da Consellería, sempre supervisada por un técnico arquiveiro e cumprindo cos requisitos de confidencialidade, seguridade e sustentabilidade ambiental.

Este labor forma parte do Plan de arquivos da Xunta de Galicia 2022-2026, centrado na mellora continua da custodia documental e na implantación de boas prácticas arquivísticas en toda a Administración autonómica.

Co avance deste traballo técnico e estratéxico, a Xunta reafirma o seu compromiso coa modernización administrativa, a protección do patrimonio documental e a mellora do acceso da cidadanía á información pública.