A Deputación de Pontevedra traballa xa na edición 2026 do programa 'Lecer en Familia', unha iniciativa que ofertará preto de 3.000 prazas con estancias subvencionadas en establecementos hoteleiros da provincia. Segundo destacou o presidente Luis López, trátase do "primeiro programa centrado nas familias" da institución provincial, que xa se consolidou como un "éxito rotundo".

O orzamento ascende a máis de 300.000 euros e está destinado a familias con menores ao seu cargo. Delas, 50 prazas serán totalmente gratuítas (subvención do 100%), mentres que o resto contará con axudas de 60 euros para maiores de 12 anos, 30 euros para nenos de 3 a 12 e gratuíto para menores de 3. As estancias, dunha noite, desenvolveranse en fins de semana, períodos non lectivos ou vésperas de festivo, sempre en temporada baixa, e incluirán opcións como spas, balnearios, talasos e hoteis urbanos ou rurais.

López subliñou que o obxectivo é "reforzar os lazos familiares nun ambiente de convivencia". Unha vez contratada a empresa xestora, a Deputación publicará as bases e abrirá o prazo de inscrición.