A lonxa de Tragove en Cambados converterase nun referente do sector pesqueiro galego tras unha investimento de 1,4 millóns de euros que permitiu modernizar por completo as súas instalacións. O presidente da Xunta, Alfonso Rueda, destacou durante a visita ás obras que esta actuación responde ao "compromiso co sector marítimo-pesqueiro", un dos motores económicos de Galicia que funciona como "unha mostra perfecta desa Galicia Calidade".

As obras transformaron a lonxa cunha nova sala de poxas, espazos de almacén, oficinas, vestiarios e unha área específica de 300 metros cadrados para o tratamento e limpeza do peixe. Rueda subliñou que "a xente do mar, que está a recoller o mellor produto do mundo, necesita as mellores instalacións" para poñer en valor o produto, nunha infraestrutura que move anualmente 6,3 millóns de euros en vendas.

A renovación coincidiu co mellor momento da lonxa, que se consolida como líder en volandeira fresca ao concentrar o 75% das vendas en Galicia. Na actual tempada de Nadal, Tragove está a bater récords históricos con máis de 7.000 quilos diarios descargados durante a primeira semana, confirmando o éxito dunha aposta estratéxica que complementa outras iniciativas como a plataforma Lonxas galegas 4.0 ou o Bono Peixe.