O novo Rondallas Fest de Mos nace co selo institucional da Xunta de Galicia. O director de Turismo de Galicia, Xosé Merelles, destacou durante a inauguración desta primeira edición que o evento "nutre a oferta turística do Sur de Galicia cunha proposta musical de forte arraigo popular", ao tempo que contribúe á desestacionalización e serve como motor de activación turística. A cita, que se celebra ata o próximo domingo 14 de decembro, enmárcase na aposta da consellería por proxectos que "reforzan a identidade dos territorios" e dan visibilidade ao patrimonio inmaterial galego.

A vocación do festival é consolidar a Mos e a provincia de Pontevedra como referencia cultural dentro do xeodestino Ría de Vigo-Baixo Miño. Nesta súa estrea, o certame reúne 17 agrupacións federadas, poñendo en valor a tradición das rondallas como un atractivo capaz de xerar sinerxias entre o ámbito cultural e o turístico.