A maxia dos contos orientais tomará este domingo o auditorio de O Rosal. A Agrupación Musical do Rosal pechará o ano cultural cun espectáculo único, o seu tradicional Concerto de Nadal, que nesta ocasión mergullará ao público nas lendas de ‘Sherezade. As mil e unha noites’. A cita será o 21 de decembro ás 19.00 horas, cunha apertura de portas media hora antes.

O concerto vai máis alá da música para ofrecer unha experiencia multidisciplinar pensada para todas as idades. Sobre o escenario, a narración dos actores Josito Porto, María Domínguez e Davide González entrelazarase coas interpretacións da Banda da Agrupación Musical e do Coro da Escola de Música, baixo a dirección de Javier Alonso Pérez.

A alcaldesa, Ánxela Fernández Callís, destacou o valor comunitario do evento. “Este concerto é moito máis que unha actuación musical, é unha experiencia compartida que nos une como pobo e que reflicte o enorme talento e dedicación da Agrupación Musical do Rosal”, sinalou a rexedora.

As entradas xa están á venda con varias modalidades. Os alumnos da Escola de Música poden retirar a súa entrada gratuita na oficina. As persoas socias teñen acceso a entradas anticipadas a 3 euros (cun máximo de dúas por persoa), mentres que o público xeral pode adquirilas anticipadamente por 5 euros na oficina da Agrupación, no establecemento Milar Tele-Son ou a través da plataforma en liña Vivetix. O prezo na taquilla do auditorio o día do evento será de 6 euros.