A crise do modelo de sociedade democrática e o seu reflexo no ámbito educativo centrarán as sesións do II Congreso Internacional Eurocidade e Educación, que se celebrará os días 30 e 31 de xaneiro nas cidades de Valença e Tui. O congreso, que xunta a expertos de ámbito nacional e internacional, abordará tamén o desafío de integrar a intelixencia artificial baixo principios democráticos.

A primeira xornada, o venres 30 no auditorio da Escola Superior de Ciencias Empresariais (ESCE) de Valença, inaugurará coa conferencia "A crise do noso modelo de sociedade democrática: razóns e perspectivas", a cargo do doutor Antonio Sampaio Novoa. A sesión incluirá tamén a presentación de experiencias socioeducativas no marco do proxecto Escolas Bilingües e Interculturais da Fronteira.

O sábado 31, o congreso trasladarase a Tui. A mañá comezará coa ponencia "A crise do modelo de educación democrática. O traballo de valores", impartida polo doutor Antonio Bolívar e moderada por Florencio Luengo. Posteriormente, presentaranse experiencias educativas e socioeducativas desenvolvidas no municipio tudense.

A tarde do sábado estará dedicada a tres retos de futuro: unha proposta de investigación para mellorar os proxectos da Eurocidade; a análise da xestión da tecnoloxía educativa e as claves dunha intelixencia artificial baseada en valores democráticos; e a constitución dun grupo de traballo para organizar a terceira edición do congreso. Os contidos desta edición serán publicados nunha edición especial da revista Cuadernos de Pedagogía.

As persoas interesadas en asistir a este congreso, organizado no marco da cooperación transfronteiriza, poden formalizar a súa inscrición e consultar o programa completo na web ciberico.valedominho.com.