O clásico de Xosé Neira Vilas salta á escena do Auditorio Municipal de Nigrán. Este domingo, 1 de febreiro, ás 19:00 horas, o concello acollerá a posta en escena de 'Memorias dun neno labrego', unha produción do Centro Dramático Galego e Contraproducións que conmemora o 65º aniversario da publicación da emblemática novela e o décimo do pasamento do seu autor. A entrada será libre ata completar o aforo.

Nigrán convértese así no primeiro municipio da provincia de Pontevedra e no segundo de Galicia, tras Vimianzo, en recibir este montaxe teatral, que está a esgotar as localidades en cada función no Salón Teatro de Santiago de Compostela. A obra chega avalada por un grande éxito de público e crítica.

A adaptación e dirección corren a cargo do dramaturgo e actor Cándido Pazó, quen dálle vida a unha nova versión da historia de Balbino, o rapaz de aldea xa convertido nun personaxe clásico da literatura galega. O espectáculo articúlase arredor dun elenco de sete actores e preséntase como un concerto de emocións que busca conectar co público en varios niveis.

Segundo describen os promotores, a obra activa as emocións argumentais da atribulada historia do protagonista, as emocións profundas da memoria común dun mundo rural que aínda resoa, e as emocións máis inmediatas xeradas polo propio xogo teatral. Este inclúe, ademais da interpretación, elementos plásticos, lumínicos e musicais, así como doses de humor e unha comunicación directa co espectador.

A función supón unha oportunidade para revisitar dende a escena contemporánea un texto fundamental da cultura galega, renovando o seu diálogo co público no marco dunha dobre efeméride significativa.