A Deputación de Pontevedra confirma un mes máis a posición da provincia como destino de referencia dentro da comunidade. No mes de abril, Pontevedra acolleu máis de tres de cada dez persoas que se achegaron a Galicia, rexistrando un aumento de preto do 3% de visitantes respecto ao mesmo mes do ano anterior.

O turismo nacional representou o 57% do total, cun incremento de preto do 5% respecto a abril de 2025, mentres que o 43% dos visitantes que recibiu a provincia corresponden a persoas estranxeiras, máis de 61.000 turistas. Ademais, o grao de ocupación hoteleira na provincia medrou en oito puntos respecto ao mesmo mes do ano pasado, sendo especialmente destacable o incremento en Vigo (14 puntos máis) e Pontevedra (10 puntos máis).

Boas perspectivas para maio

No que respecta ao mes de maio, ata a data, a oficina central de Turismo Rías Baixas, situada no Palacete das Mendoza en Pontevedra, recibiu un total de 2.334 visitantes, preto de 500 persoas máis que no mesmo período de 2025. Os turistas españois situáronse en preto do 42%, sendo os lugares de procedencia máis destacados Madrid (9,2%) e Barcelona (3,1%). Entre os turistas estranxeiros, destacan Alemaña (7,2%), Estados Unidos (6%) e Italia (4,8%).

O tipo de aloxamento preferido polos visitantes son os hoteis, con máis do 29%, seguidos polos albergues (27%) e os hostais ou pensións (11%). Entre os motivos que subliñan os turistas para elixir a provincia salientan o Camiño de Santiago (48%) e a oferta de lecer (19%).