O presidente da Deputación de Pontevedra, Luis López, anunciou  que as axudas ás escolas de música xestionadas por asociacións sen ánimo de lucro aumentan este ano un 20% o seu crédito ata chegar aos 144.000 euros, unha suba que alcanza o 60% se se compara co orzamento que recibían durante o anterior mandato. A Xunta de Goberno provincial deu luz verde ás bases da nova convocatoria, "dentro do compromiso que mantemos co tecido asociativo da provincia", sinalou López, que tamén asegurou que as axudas son "fundamentais para que estas entidades manteñan con vida as escolas de música no conxunto do territorio da nosa provincia".

As axudas permitirán financiar gastos de persoal, material de oficina, subministracións, reparación e conservación de locais, reparación de instrumentos, primas de seguros, servizos de asesoría ou xestoría, así como gastos de prevención de riscos ou recoñecemento médico. As subvencións outorgaranse en réxime de concorrencia competitiva e teranse en conta criterios como o número de alumnos, o número de docentes, o orzamento de gastos da escola ou as especialidades impartidas.

"Seguimos a dar pasos para que cada ano esta liña conte cun maior crédito que poida atender as demandas destas escolas: con esta nova suba do 20% nos seus recursos, estamos cumprindo a nosa palabra", sinalou o presidente da Deputación. A Deputación ten en conta na súa aposta por estas axudas que as escolas adoitan ser o primeiro contacto con profesionais do eido educativo musical, que transmiten coñecementos e valores culturais á vez que fomentan a práctica da música, e que ademais supoñen un elemento dinamizador do territorio.