O Consello da Xunta aprobou este luns o nomeamento de Susana Pérez Iglesias como secretaria xeral de Emprego e Relacións Laborais, dependente da Consellería de Emprego, Comercio e Emigración. A viguesa ocupará o cargo que deixou Pablo Fernández López, quen a comezos de mes foi nomeado delegado territorial da Xunta en Pontevedra.

Nada en Vigo en 1984, Pérez Iglesias é licenciada en Administración e Dirección de Empresas (ADE) pola Universidade de Vigo, onde tamén realizou un mestrado en Finanzas. Conta ademais cun máster internacional en Finanzas pola Universidade de Bratislava e un Executive MBA pola Galicia Business School. A súa traxectoria profesional inclúe máis de 20 anos de experiencia en dirección financeira, consultoría estratéxica e xestión de proxectos, cunha especial dedicación ao financiamento público e ao desenvolvemento empresarial.

Entre os cargos de responsabilidade que ocupou destacan o de directora de INFI Consultores (cargo que ostentaba na actualidade), directora de Etiqueta Ibérica (2013-2026) e presidenta de Empresarias Galicia (2016-2026), entidade da que tamén é fundadora. O seu labor profesional supúxolle o outorgamento de distintos recoñecementos como o Premio Executivos Galicia 2018 á Xestión Empresarial e Institucional, así como a súa inclusión en clasificacións entre as galegas máis influentes e entre as mulleres líderes no ecosistema empresarial nacional.