A Xunta vén de licitar por 9,6 millóns de euros as obras dos 80 aloxamentos compartidos que se construirán en San Paio de Navia, en Vigo, destinados ao alugueiro para menores de 36 anos. A conselleira de Vivenda e Planificación de Infraestruturas, María M. Allegue, e o conselleiro de Cultura, Lingua e Xuventude, José López Campos, presentaron este mércores a promoción, que é a primeira deste tipo que se licita en Galicia.

O inmoble, deseñado polos arquitectos Alfonso Penela e Juan Taboada, terá planta baixa e catro plantas, con 20 aloxamentos en cada unha, dos cales catro estarán adaptados para persoas con mobilidade reducida. O edificio disporá de espazos comúns para traballo e coworking, zona de lavandería en cada planta e 92 prazas de aparcadoiro para bicicletas. A cuberta transitable converterase nunha gran terraza exterior con hortos elevados para uso dos residentes.

A conselleira de Vivenda enmarcou esta actuación nas medidas impulsadas pola Xunta para facilitar o acceso á vivenda da xente moza, como a reserva do 40% das novas vivendas de alugueiro e o 25% das de venda para menores de 36 anos, os avais para compra de vivenda ou as axudas de adquisición en centros históricos. O conselleiro de Cultura, Lingua e Xuventude encadrou a iniciativa no Plan estratéxico de Xuventude 2025-2027, dotado con máis de 700 millóns de euros e 130 medidas, e destacou o éxito do Bono Emancípate, que este ano recibiu máis de 3.600 solicitudes.

O prazo para presentar ofertas remata o 1 de outubro, e o prazo de execución das obras será de 24 meses. A Xunta ten en marcha proxectos de aloxamentos compartidos tamén en Santiago, Lugo e A Coruña, que suman un total de 340 vivendas. Ademais, no barrio de Navia, a Xunta promove 927 vivendas de promoción pública, con 309 en obras e o resto licitadas ou adxudicadas. O investimento mobilizado ata agora, incluíndo proxectos, obras e adquisición de solo, ascende a 238 millóns de euros. A Xunta tramita tamén dous Proxectos de Interese Autonómico en Vigo, en Ofimático (2.000 vivendas) e Ramón Nieto (1.300 vivendas), para desenvolver solo residencial.