O BNG de Mondariz Balneario denunciou este venres a decisión da Xunta de Galicia de excluír o municipio do proxecto de construción da senda peonil e ciclista prevista na estrada PO-254 entre Ponteareas e Mondariz, unha actuación orzada en case 1,9 millóns de euros. Para a formación nacionalista, esta exclusión constitúe unha discriminación para a veciñanza e carece de lóxica desde o punto de vista da mobilidade e da seguridade viaria.

O portavoz do BNG e alcalde de Mondariz Balneario, César Gil, considerou "incomprensible que un proxecto que pretende mellorar a mobilidade entre Ponteareas e Mondariz deixe fóra precisamente o concello situado entre ambos, un dos principais centros turísticos e de servizos da comarca do Condado". Gil engadiu que "é difícil non interpretar esta decisión como un novo exemplo do uso partidista que o PP fai dos investimentos da Xunta" e lembrou que "esta situación súmase ao bloqueo que sofre a recuperación da Fonte de Troncoso, outro exemplo do trato discriminatorio que recibe Mondariz Balneario por parte do Goberno galego".

O BNG subliñou que a exclusión do municipio non só carece de xustificación política, senón tamén técnica, xa que a estrada PO-254 é utilizada diariamente por numerosos peóns e ciclistas que se desprazan entre Ponteareas, a parroquia de Pías, Mondariz Balneario e Mondariz sen dispoñer dunha infraestrutura segura, compartindo a calzada co tráfico rodado. A formación lembrou ademais que xa presentou emendas aos Orzamentos da Xunta para 2026 co fin de habilitar unha conexión peonil entre Mondariz Balneario e Mondariz, proposta que foi rexeitada polo PP.

Por todo iso, a formación nacionalista reclamou á Xunta de Galicia e á Axencia Galega de Infraestruturas que rectifiquen o proxecto e incorporen unha senda peonil e ciclista continua entre Ponteareas, Mondariz Balneario e Mondariz, garantindo unha planificación baseada no interese xeral e non en criterios partidistas.