O Concello de Redondela adxudicou as obras de pavimentación e mellora de servizos en dous camiños da parroquia de Reboreda: o Camiño do Casal e a Estrada da Quintana, cun investimento total de 185.864,55 euros. As actuacións, que xa están contratadas, forman parte do plan municipal de investimento nas parroquias, dotado con 2,7 millóns de euros.

A intervención de maior orzamento executarase no Camiño do Casal, no barrio de Asnelle de Abaixo, cun custo de 143.756 euros, e inclúe a renovación de 660 metros de firme, a instalación dunha nova rede de recollida de augas pluviais de 420 metros e a ampliación do viario nun treito en curva mediante muros de contención de granito. A superficie total renovada será de 3.672 metros cadrados.

Na Estrada da Quintana, cun orzamento de 42.108 euros, os traballos afectarán un tramo de 400 metros, desde o número 102 ata o encontro co Camiño Poza do Monico, onde se estenderá unha nova capa de rodaxe e se mellorará o sistema de drenaxe con tubaxe de PVC.

A alcaldesa, Digna Rivas, subliñou que "estas obras no rural son unha prioridade absoluta para este Goberno co fin de equiparar as condicións de vida, mobilidade e servizos de todas as parroquias". O concelleiro de Infraestruturas e Sostibilidade, Roberto Villar, detallou que non se trata de simples parches no firme, senón de actuacións integrais que mellorarán a seguridade viaria e previrán asolagamentos.

Os traballos coordinaranse para minimizar as molestias no tráfico da parroquia durante o seu desenvolvemento.