O BNG do Porriño denunciou  que os actos vandálicos no cemiterio municipal continúan sen resposta por parte do goberno local, que dirixe Alejandro Lorenzo (PP). A formación nacionalista asegura que os roubos de cobre, cables, mármores, marcos con cristais e outros materiais dos nichos e tumbas se multiplicaron nos últimos meses, causando preocupación entre a veciñanza.

Segundo o BNG, un dos accesos ao camposanto permanece sempre aberto e o espazo carece de vixilancia, o que facilita estes actos delituosos. A forza nacionalista presentou en xullo unha solicitude de solución, pero o alcalde respondeu no pleno evidenciando que non se adoptou ningunha medida. "Non é un problema menor. Os cemiterios son espazos moi sensibles para a cidadanía. Son lugares de memoria e de respecto aos e ás que xa non están", afirmou Marcelo Rodríguez, membro do grupo do BNG.