Vacinar os máis pequenos contra a gripe sen pasar pola agulla xa é posible en 75 colexios de Galicia. O programa piloto de vacinación escolar da Consellería de Sanidade chega este curso a 20 centros máis que o ano pasado e aspira a protexer 26.536 rapaces, repartidos polas sete áreas sanitarias da comunidade.

O sistema é sinxelo: o alumnado de entre 3 e 11 anos pode recibir a vacina intranasal, sen picada, directamente no centro educativo. Os colexios participantes están distribuídos por contornos urbanos, semiurbanos e rurais, para comprobar como funciona a iniciativa en realidades moi distintas.

Unha experiencia que medra

O programa nace da experiencia do curso pasado, cando Sanidade ampliou a vacinación infantil fronte á gripe, que ata entón chegaba aos cinco anos, ata os 11. Á vez púxose en marcha o primeiro proxecto piloto nos colexios, que permitiu vacinar a 9.668 alumnos cunha cobertura do 51 %.

Co novo alcance, a poboación infantil á que se dirixe o programa sobe ata preto de 26.500 estudantes, ao redor de 7.500 máis que na campaña anterior.

Que colexios participan

Na área sanitaria da Coruña e Cee son 12 centros. Na cidade, o CEIP Eusebio da Guarda, o CEIP María Barbeito e Cerviño, o CEIP Raquel Camacho e o CPR Fogar de Santa Margarida. Completan a lista o CEIP Ramón Otero Pedrayo da Laracha, o CEIP Ponte dos Brozos de Arteixo, o CEIP Francisco Vales Villamarín de Betanzos, o CEIP Fogar de Carballo, o CPR Andaina e o CPR Montespiño, ambos de Culleredo, o CPR Nuestra Señora del Carmen de Fisterra e o CPR Hijas de Cristo Rey de Oleiros.

Na área de Ferrol participan catro colexios: o CEIP Cruceiro de Canido, o CEIP Plurilingüe de Ponzos, o CEIP San Xoán de Filgueira e o CPR Sagrado Corazón.

Na área de Santiago de Compostela e Barbanza son 14. Na capital, o CEIP das Fontiñas, o CEIP Pío XII e o CPR La Salle. Tamén están o CPR Nosa Sra. de Lourdes da Estrada, a EEI Milladoiro de Ames, o CPR Nosa Sra. Rosario de Arzúa, o CEIP Xesús Golmar de Lalín, o CEIP O Coto de Negreira, o CEIP Alfonso D. Rodríguez Castelao de Ordes, o CEIP Camiño Inglés e o CEIP de Sigüeiro, ambos en Oroso, o CPR Nosa Señora Inmaculada de Santa Comba, o CEIP Plurilingüe de Silleda e o CPR Mª Inmaculada, tamén de Silleda.

Na área de Pontevedra e O Salnés participan nove centros. Na cidade de Pontevedra, o CEIP A Xunqueira II, o CEIP Vilaverde Mourente, o CPR Sagrado Corazón de Jesús e a EEI Concepción Crespo Rivas. Ademais, o CPR Sonrisas y Lágrimas da Illa de Arousa, o CEIP San Tomé de Cambados, o CPR San Narciso de Marín, o CEIP Arealonga e o CPR Sagrada Familia, ambos de Vilagarcía de Arousa.

Na área de Lugo, A Mariña e Monforte de Lemos son 12. Na cidade de Lugo, o CEIP Luis Pimentel e o CPR Plurilingüe San José. O resto de centros son o CEIP Plurilingüe Vista Alegre de Burela, o CEIP Xoán de Requeixo de Chantada, o CPI Plurilingüe Virxe do Monte de Cospeito, o CPI Plurilingüe Dr. López Suárez de Friol, o CEIP Lagostelle de Guitiriz, o CPR Real Colegio Padres Escolapios de Monforte de Lemos, o CEIP Plurilingüe de Monterroso, o CPR Plurilingüe Ntra. Sra. de la Asunción de Sarria, a EEI de Vilalba e o CPR Plurilingüe Landro de Viveiro.

Na área de Vigo participan 11 colexios. Na cidade, o CEIP García Barbón, o CEIP Lope de Vega, o CEIP Pintor Laxeiro, o CEIP Seis do Nadal, o CPR Plurilingüe Apóstol Santiago e a EEI Vila Laura. Fóra dela, o CEIP Plurilingüe de Reibón en Moaña, o CPR Plurilingüe Lar en Mos, o CRA María Zambrano do Rosal, o CRA Raíña Aragonta de Salceda de Caselas e o CEIP Plurilingüe Infante de Borbón de Salvaterra de Miño.

Por último, na área de Ourense, Verín e O Barco de Valdeorras son 13. Na cidade de Ourense, o CEIP Plurilingüe Irmáns Villar e o CPR Plurilingüe Divina Pastora. Tamén están o CPR Pablo VI Fátima da Rúa, o CEIP Padre Feijoo de Allariz, o CPI Plurilingüe Antonio Failde de Coles, o CPI Terras de Maside, o CEIP Plurilingüe Calvo Sotelo e o CPR Plurilingüe Sagrado Corazón, ambos do Carballiño, os CPR Plurilingües Guillelme Brown e Miraflores do Pereiro de Aguiar, o CPR Plurilingüe María Inmaculada de Verín e os CEIP Carlos Casares e Rosalía de Castro de Xinzo de Limia.

Gripe e covid: máis protección para os maiores

A vacinación escolar convive cunha campaña de inmunización fronte á gripe e á covid que este ano presenta outra novidade importante: a vacina antigripal de alta carga esténdese ás persoas de 65 a 69 anos. O ano pasado administrábase a partir dos 70, despois de que os resultados do ensaio Galflu, no que participaron preto de 135.000 persoas de 80 anos ou máis, confirmasen a súa maior capacidade para reducir as hospitalizacións por gripe.

Na poboación infantil mantense a vacinación dos 6 meses aos 11 anos, coa vacina intranasal como opción preferente entre os 2 e os 11 anos, o que evita a picada.

A campaña organízase a través dos centros de saúde, ademais da vacinación nas residencias e nos domicilios das persoas inmobilizadas. Como é habitual, comeza polas residencias de maiores e os centros de discapacidade, e vai incorporando os distintos colectivos de maneira progresiva, segundo o seu grao de vulnerabilidade.

Quen debe vacinarse e que obxectivos hai

A campaña dirixese especialmente a persoas maiores, cativada, embarazadas, profesionais sanitarios e persoas con condicións de risco. Sanidade marca como metas acadar polo menos o 60 % de cobertura na poboación infantil, nas embarazadas e nos traballadores sanitarios, e un mínimo do 75 % de vacinación fronte á gripe entre as persoas de 60 ou máis anos.

Para chegar aí, a Consellería prevé intensificar os chamamentos ao persoal sanitario e incrementar a vacinación das embarazadas. Recorda tamén que a finalidade da vacina non é só evitar o contaxio, senón reducir o número e a gravidade das complicacións da gripe e da covid.

A citación faise por SMS e, despois, hai unha repesca por chamada telefónica para quen non puido vacinarse na primeira quenda.

Protección tamén para os lactantes

Á marxe da gripe, xa está en marcha a campaña de inmunización infantil fronte ao virus respiratorio sincitial, que protexe os lactantes dunha das principais causas de infección respiratoria e de hospitalización nos primeiros meses de vida.

Galicia, por riba da media estatal

Segundo os datos de Sanidade, na campaña do ano pasado Galicia volveu rexistrar taxas de cobertura superiores á media estatal, tanto na gripe como na covid, en practicamente todos os grupos. Nos maiores de 65 anos, a cobertura antigripal foi do 72,36 %, fronte ao 58,47 % de España. Entre os maiores de 80, do 81,22 %, fronte ao 64,75 %.

Na vacinación contra a covid nese mesmo grupo de maiores de 80, Galicia chegou ao 67,47 %, fronte ao 54,58 % da media española. E na vacinación infantil contra a gripe, entre 1 e 5 anos, a cobertura galega foi do 71,09 %, fronte ao 52,39 % estatal.

Para resolver calquera dúbida sobre a vacinación, convén consultar co centro de saúde ou co persoal sanitario de referencia.