O Concello do Porriño recibiu onte mércores o distintivo "Bandeira Verde de Galicia", un galardón promovido pola Xunta que recoñece ás entidades locais máis dinámicas na protección da contorna, a redución de emisións e o fomento da economía circular. A distinción valorou o traballo do municipio en instrumentos como a Axenda Urbana e Rural 2030, o Plan de Mobilidade Urbana Sostible e a dixitalización do ciclo da auga a través do Consorcio de Augas do Louro. Tamén se tiveron en conta a renovación do alumeado público con tecnoloxía LED, a frota municipal de vehículos eléctricos e híbridos e a recollida separada porta a porta.